काठमाडौं, ८ असार – ब्राजिलले यस विश्वकपको आफ्नो दोस्रो खेल शुक्रवार कोस्टारिकाविरुद्ध खेल्दैछ । समूह ईको शीर्ष स्थान कब्जा गर्नका लागि ब्राजिलले आजको खेल जित्नैपर्ने हुन्छ । 

ब्राजिलले पहिलो खेलमा स्विट्जरल्यान्डसँग निराशाजनक १–१ गोलको बराबरी खेलेको थियो । उता कोस्टारिका भने सर्बियाविरुद्ध १–० को अन्तरले हारेको थियो । 

कोस्टारिकालाई हराएमा ब्राजिलको आत्मविश्वास राउन्ड अफ १६ मा ह्वात्तै बढ्नेछ । 

कोस्टारिकाले पनि ब्राजिललाई हराएमा अर्को चरणमा पुग्ने सम्भावना बलियो हुने बुझेको छ । ब्राजिल आज हारेमा समूह चरणबाटै बाहिरिने सम्भावना रहन्छ । 

ब्राजिल यो विश्वकपको प्रबलतम दाबेदारका रूपमा आएको थियो । टोलीमा नेयमार, गेब्रिएल जिसस र फिलिप्पे कउटिन्हो जस्ता स्टार खेलाडी छन् । तर उनीहरू अर्को चरणमा पुग्नका लागि आजको र अर्को खेलमा जित्नैपर्ने हुन्छ । 

आजको खेलमा नेयमार खेल्नेमा शंका छ । उनले खेलअघि ब्राजिलका दुई ट्रेनिङ सत्रमा भाग लिएका थिएनन् । उनलाई यही खेलमा खेलाएर रिस्क लिने कि सर्बियासँगको अझ गाह्रो खेलका लागि बचाएर राख्ने भनी टिटेले निर्णय लिनुपर्नेछ । 

नेयमारको ठाउँमा गेब्रिएल जिसस आउन सक्छन् अनि रोबर्टो फिर्मिनो पनि फ्रन्टमा हुन सक्छन् । 

ड्यानिलोलाई पनि घुँडामा समस्या छ र उनलाई फ्याग्नरले रिप्लेस गर्न सक्छन् ।

गोल डट्कमबाट