बुटवल, ८ असार - बुटवल उपमहानगरपालिका कार्यालयलाई स्थानीय सरकारको आधुनिक भवनका रुपमा निर्माण गरिने भएको छ ।

नेकपाका महासचिव विष्णु पौडेलले एक समारोहबीच आज कार्यालय भवनको शिलन्यास गरे । त्यसक्रममा उनले बुटवलको बुद्धकालीन सभ्यता र ऐतिहासिक महत्वलाई झल्काउने गरी काम गर्न जरुरी रहेको बताए । आधुनिक भवनको निर्माण कार्य समयमै सक्न आग्रह गर्दै उनले निर्माण कार्यमा नागरिकको पनि निगरानी र खबरदारी जरुरी रहेको बताए ।

सेवाग्राहीका कामलाई पहिलो प्राथमिकता राखेर अगाडि बढ्नुपर्ने पौडेलको सुझाव थियो । लुम्बिनी र बुद्धबल्लीलाई केन्द्रमा राखेर समग्र प्रदेशको विकासका लागि जुट्न जरुरी रहेको उनको भनाइ छ । ‘अहिले सरकारले समाजवादको वस्तुगत आधार तयार पार्ने गरी काम गरिरहेको छ,’ उनले भने ।

बुटवल उपमहानगरपालिकाले करीब ३ विगाहा जग्गामा गुरुयोजना बनाएर अत्याधुनिक कार्यालय भवन निर्माणको काम शुरू गरेको नगर प्रमुख शिवराज सुवेदीले जानकारी दिए  । सुन्दर बुटवल, समृद्ध बुटवल, सुखी बुटवलवासीको संकल्प अनुसार आफूहरू आवधिक र दीर्घकालीन महत्वका काममा केन्द्रीत रहेको उल्लेख गर्दै प्रमुख सुवेदीले बुटवलको विकासमा सबैसँग हातेमालो गरिने बताए ।

प्रमुख प्रशासनिकसहित अरु ६ वटा ब्लकमा भवन निर्माण गर्ने गरी गुरुयोजना बनाइएको प्रमुख प्रशासकीय अधिकृत राजनकुमार बिसीले जानकारी दिए  । आज शिलन्यास भएको भवन प्रमुख अर्थात् ‘ए ब्लक’ हो । अन्डरग्राउण्डसहित ४ तलाको आधुनिक भवनको अनुमानित लागत ५४ करोड ७८ लाख ४५ हजार ३ सय ८१ रुपैयाँ ५२ पैसा रहेको योजना प्रमुख इन्जिनियर सुमन श्रेष्ठले जानकारी दिए । 

निर्माण कम्पनी विकोही, शिवशक्ति, वन्दन भगवति जेभी न्यू बानेश्वरले ४३ करोड ५३ लाख ४९ हजार ५ सय ७२ रुपैयाँ ८४ पैसामा आगामी २०७८ असारमा सक्ने गरी असार ६ गते बुधबार ठेक्का सम्झौता गरेको इन्जिनियर गौतम रौनियारले जानकारी दिए । भवनमा रहेको अन्डरग्राउण्डमा १ सय ६ वटा मोटरसाइकल, ३५ वटा कारलाई पार्किङ गर्न मिल्ने छ । यसका अतिरिक्त बाहिरी पार्किङ छुट्टै छ । भवनमा २ अलग–अलग स्थानमा लिफ्ट र २ वटै सिँढी रहने इन्जिनियर रौनियारले बताए । 

विक्रम सम्वत् २०१६ सालमा स्थापना भएको बुटवलको हालको मूल भवन २०३५ सालमा निर्माण भएको हो । यो मूल भवनसहितका कार्यालय भवनहरू प्रायः जीर्ण र गएको भूकम्पले चर्किएको अवस्थामा छन् ।