काठमाडौं, १० असार – भारतको निजी एयरलाइन्स कम्पनी एयर एसियाको एक उडानका यात्रुहरूले आफूहरूलाई विमानबाट जबर्जस्ती निकाल्नका लागि एसीलाई जानीबुझी चर्को बनाइएको आरोप लगाएका छन् ।

एसी चर्काइएपछि विमानमा धूँवा भरिएको थियो । एयरलाइन्स कम्पनीले भने उडानमा प्राविधिक समस्या आएको तर यात्रीहरूलाई कुनै पनि दुर्व्यवहार नगरिएको बतायो । 

एयर एसियाको यो विमान कोलकाताबाट बागडोगरा गइरहेको थियो । तर कोलकाता विमानस्थलमै यो साढे चार घन्टा बसिरह्यो । यात्रुहरूलाई डेढ घन्टा जति विमानभित्रै राखिएको अनि पछि निकाल्नका लागि एसी चर्को बनाएको आरोप छ । त्यसपछि विमानमा धूँवा छायो अनि मानिसहरूलाई सास लिन अप्ठ्यारो भयो । 

विमानमा भारतीय तेल निगमका कार्यकारी निर्देशक दीपांकर राय पनि थिए । उनका अनुसार, ‘कोलकाता विमानस्थलमा पानी दर्किरहेको थियो । त्यसैले यात्रुहरू विमानबाहिर जान मानेनन् । त्यसपछि क्याप्टेनले यात्रुहरूलाई तर्साउनका लागि एयर कन्डिसनरको ब्लोअर चर्काए । त्यसले गर्दा विमानभित्र डरलाग्दो वातावरण छायो । विमानमा धूँवा भरियो र मानिसलाई सास फेर्नै गाह्रो भयो । बच्चाहरू रुन थाले अनि बान्ता गर्न थाले ।’

दीपांकरले सामाजिक सञ्जालमा यसको भिडियो पनि सार्वजनिक पनि गरेका छन् । 

एयर एसियाले पछि बयान जारी गर्दै प्राविधिक गडबडीका कारण विमानमा साढे चार घन्टाको ढिलाइ भएको बतायो । प्राविधिक गडबडीले गर्दा नै एयर कन्डिसनर बिग्रिएको र कुनै पनि यात्रीलाई खतरामा नपारेको उसले स्पष्टीकरण दियो ।

एजेन्सी