काठमाडौं, १० असार – चीनमा समुद्र सतहबाट ५० सय फीटको उँचाइमा नयाँ विमानस्थल तयार पारिँदैछ । चोङकिङ शहरमा पहाड काटेर विमानस्थल बनाइँदैछ ।

विमानस्थल बनाउन २७३२ करोड रुपैयाँ खर्च गरिनेछ । यसको नाम वुशान राखिनेछ । 

चोङकिङको वुशान शहरको बाहिरी क्षेत्रमा १५ किलोमिटरको दूरीमा पहाडको टुप्पोमा विमानस्थल बनाइँदैछ । यो राष्ट्रिय विमानस्थलका लागि २६ सय मिटर लामो र ४५ मिटर चौडा एक धावनमार्ग हुनेछ । विमानस्थलमा पाँचवटा विमान राख्न मिल्ने ठाउँ हुनेछ । 

विमानस्थल पूरै पहाडी क्षेत्रमा हुनेछ जसकारण निर्माणका लागि पहाडहरूलाई डाइनामाइटले फुटाइँदैछ र मशिनले काटेर समतल बनाइएको छ । 

वुशान सरकारका अनुसार, यो परियोजना ६ वर्षअघि शुरू गरिएको थियो अनि यही महिनाको अन्त्यसम्ममा पूरा गरिने अपेक्षा छ । अर्को वर्षदेखि उडानसेवा शुरू हुनेछ । 

यस परियोजनाका उपनिर्देशक लियाओ हाओबोका अनुसार, निर्माणको सबभन्दा व्यस्त दिनमा साइटमा दुई हजार कामदार र ८०० मशिनले काम गरिरहेका हुन्छन् । 

वुशान विमानस्थल चोङकिङ जियाङबेई अन्तर्राष्ट्रिय विमानस्थलको ट्राफिक डाइभर्ट गर्नका लागि तयार पारिएको बताइएको छ । अघिल्लो वर्ष चोङकिङ विमानस्थलले लगभग चार करोड यात्रु ह्यान्डल गरेको थियो । 

सन् २०२० सम्म वुशान विमानस्थलले लगभग दुई लाख ८० हजार यात्रु र लगभग १२ सय टन सामानको ढुवानी गर्नेछ । यहाँबाट बेइजिङ, ग्वाङ्झाउ, चोङकिङ र चीनका मुख्य शहरतर्फ उडान हुनेछन् । 

विमानस्थललाई स्थानीय पर्यटन प्रवर्द्धन गर्ने हिसाबमा पनि महत्त्वपूर्ण मानिएको छ । विमानस्थल भएपछि त्यहाँ प्रसिद्ध गडेस पीक र तीन सुन्दर बाँध हेर्न पनि मानिस आउनेछन् ।

एजेन्सी