काठमाडौं, १८ असार – शनिवारको प्रिक्वार्टरफाइनल खेलमा फ्रान्ससँग हारेर प्रतियोगिताबाट बाहिरिएको अर्जेन्टिनाका खेलाडी ह्यभिएर मास्केरानो र लुकास बिग्लियाले अन्तर्राष्ट्रिय फूटबलबाट संन्यास लिएका छन् । 

अर्जेन्टिनाका अन्य धेरै खेलाडीले पनि यही बाटो अपनाउने अपेक्षा गरिएको छ । राष्ट्रिय टोलीको आमूल परिवर्तन गर्नुपर्ने बेला धेरै पहिले नै आइसकेको भएपनि अब चाहिँ त्यसमा ढिलाइ गर्नु हुँदैन ।

हुन पनि फूटबल खेल्ने प्रमुख राष्ट्रहरूमा अर्जेन्टिनाको जस्तो अव्यवस्थित खेल विश्वकपमा अरूको त्यति देखिएन । त्यसैले पनि अब अर्जेन्टिनी राष्ट्रिय टोलीलाई पूरै नवीकरण गर्नुपर्छ ।

टोलीको पुनर्निर्माण खासमा भन्ने हो भने सन् २०१४ मै शुरू गर्नुपर्थ्यो । त्यतिखेर राम्रो प्रदर्शन गरेर फाइनलसम्म पुगेको टोलीमा विश्वकप सकिएपछि सानातिना परिवर्तन गर्नैपर्ने थियो । तर नयाँ प्रशिक्षक गेरार्डो मार्टिनोले सन् २०१५ को कोपा अमेरिकामा त्यही सेटका खेलाडीहरू खेलाउनु उपयुक्त हुने ठाने र टोलीले लगातार तेस्रोपटक फाइनलमा पराजय बेहोर्‍यो ।

कोपा अमेरिकाको फाइनलमा हारेपछि अर्जेन्टिना संकटमा पर्‍यो अनि व्यवहारिकतावादी एड्गार्डो बाउजाले प्रशिक्षणको कमान सम्हाले । हारको पीडा सहन नसकेर कप्तान लियोनेल मेस्सीले संन्यास लिने निर्णय लिए । अनि त सबैको ध्यान मेस्सीलाई फकाएर टीममा फर्काउने र विश्वकप छनोटमा भइरहेको खराब प्रदर्शन सुधार्नेमै केन्द्रित रह्यो । यही भावना अर्को वर्ष पनि कायम रह्यो र बाउजालाई बर्खास्त गरियो । त्यसपछि जोर्गे साम्पाओलीलाई अर्जेन्टिनाको प्रशिक्षक बनाइयो ।

मास्केरानो, बिग्लिया, एन्जेल डी मारिया र गोन्जालो हिगुएनलाई राष्ट्रिय टोलीमा फेरि अवसर दिइयो । तर अन्य विकल्प नभएर मात्र उनीहरूलाई ल्याइएको थियो । विश्वकपमा छनोटमा मेस्सीले इक्वेडरविरुद्ध अद्भुत प्रदर्शन गरेर मात्र अर्जेन्टिना छानिन सफल भयो तर टोलीमा विभाजनका संकेतहरू देखिन थालिसकेका थिए ।

त्यसैले अन्तिम १६ मा फ्रान्सले अर्जेन्टिनालाई ४–३ ले हराउनु भनेको कुनै आश्चर्यको कुरा हैन किनकि थकित खेलाडीहरूले लामो समयदेखि नै आफूहरू उच्चस्तरीय अन्तर्राष्ट्रिय फूटबलका लागि उपयुक्त नभएको संकेत दिइसकेका थिए ।

अब चाहिँ टीममा गम्भीर परिवर्तन गर्ने बेला आइसकेको छ । प्रशिक्षक साम्पाओलीलाई राखिरहने कि फाल्ने भन्ने विषयमा विवाद छ । तर रुस गएका १८ जना खेलाडीलाई टोलीबाट निकालिदिए हुन्छ भन्नु कुनै अतिशयोक्ति होइन । कप्तान मेस्सीलाई टीममा बसिरहनका लागि फकाउनु नै उपयुक्त हुन्छ अनि सर्जिओ अग्वेरो, निकोलस ओटामेन्डी र अन्य केही खेलाडी चाहिँ नयाँ अर्जेन्टिनी टोलीमा अटाउन सक्छन् ।

अर्जेन्टिनाका लागि राम्रो खबर भनेको उसको बेन्चमा प्रतिभाशाली खेलाडीहरू छन्, भलै रुसमा उनीहरूले प्रतिभा प्रदर्शन गर्न पाएनन् । पेरिस सेन्ट–जर्मेन क्लबका लागि खेल्ने जियोभानी लो सेल्सोलाई विश्वकपको एउटा म्याच पनि खेलाइएन र मास्केरानोमा विश्वास गरियो । तर लो सेल्सोसँग सटीक बल पास गर्ने क्षमता छ र उनले मिडफील्डलाई गतिमान बनाइरहन्छन् । अनि लियो पारेडेसलाई पनि विश्वकपमा मौका दिइएन । लो सेल्सो र पारेडेसको जोडीले अर्जेन्टिनालाई आवश्यक गति दिन सक्थ्यो ।

उनीहरू बाहेक पनि सान्टियागो आस्कासिबारका रूपमा राम्रा डिफेन्डर छन् । उनी राम्रो ट्याकल गर्न सक्छन् खेलकै क्रममा दिमाग चलाउन पनि सक्छन् ।

गोलकीपरको कुरा गर्दा अर्जेन्टिनाले विश्वकपमा तीनजना कीपर लग्यो तर उनीहरूको विकल्प खोज्ने बेला आइसकेको छ । रियल सोसिडाड क्लबबाट खेल्ने जेरोनिमो रुल्ली उत्तम विकल्प हुन् अनि जुआन मुस्सो पनि राम्रा कीपर हुन् ।

डिफेन्समा इम्मानुएल मम्माना छन् र उनलाई ब्याकअप गर्ने लुकास मार्टिनेज क्वार्टा पनि छन् । फाब्रिसिओ बुस्टोस फुल ब्याकमा राम्रो खेलिरहेका छन् भने निकोलास ताग्लियाफिकोले लेफ्ट ब्याक पोजिसनमा कायम रहिरहनु जरूरी छ ।

टीममा मेस्सी बसेपनि नबसेपनि पाउलो डिबालाले खेल्ने मौका पाउनुपर्छ र अझ उनी त टीमको स्थायी सदस्य नै हुनुपर्छ । यी दुवैलाई एकैचोटि खेलाइँदा भने टीमले राम्रो प्रदर्शन गर्न सकेको थिएन । तर जोडीलाई सफल बनाउनका लागि गृहकार्य शुरू गर्नैपर्ने हुन्छ । युभेन्टसबाट खेल्ने डिबालालाई टीमले बाहिर राख्न मिल्दैन ।

अनि फर्वार्ड पोजिसनमा माउरो इकार्डी र लाउटारो मार्टिनेजले आगामी दशकभरि कब्जा गर्नसक्ने क्षमता राख्छन् । त्यसबाहेक क्रिस्चियन पाभोनलाई पनि बिर्सन मिल्दैन । उनी रुसमा असफल भएपनि भविष्यमा शीर्ष खेलाडीका रूपमा उदाउने सम्भावना छ ।

यस्तो हुनसक्छ सम्भावित टोली :

यी माथि नाम लिइएका खेलाडीहरूलाई निरन्तर खेलाइएमा अर्जेन्टिनाले कतारमा सन् २०२२ मा हुने विश्वकपमा र त्यसपछि पनि राम्रो प्रदर्शन गर्ने अपेक्षा राख्न सकिन्छ । 

मेस्सी नि ? बार्सिलोनाका यी जादूयी खेलाडीका लागि विश्वकप अत्यन्तै निराशाजनक रहेपनि उनले केही बोलेका छैनन् । विश्वकपबाट टीम बाहिरिएपछि उनी एक्लै स्पेन गए र उनको भविष्यका बारेमा अन्योल कायम छ । 
अहिले तत्कालका लागि मेस्सीले राष्ट्रिय टोलीसँग सम्बन्धविच्छेद गर्नसक्ने सम्भावना छ । उनी टोलीमा पछि फेरि फर्किए हुन्छ । 

तर अर्जेन्टिनाले यो विश्वकपमा पाएको सबभन्दा ठूलो पाठ के हो भने मेस्सी एक्लैले टोलीलाई विश्वविजेता बनाउन सक्दैनन् । उनी भएपनि नभएपनि अर्जेन्टिनाले भविष्यको तयारीस्वरूप सन्तुलित र युवाजोशयुक्त टोली तयार गर्नुपर्छ । 

तर त्यो शून्यमा हुने कुरा हैन । यो विश्वकपपछि साम्पाओली वा उनको ठाउँमा आउने अर्को प्रशिक्षकले थकित र द्वन्द्वग्रस्त टोलीलाई पुनरुद्धार गर्ने र नयाँ प्रतिभा भित्र्याउने साहस गर्नुपर्छ । अनि सधैं विवादमा परिरहने अर्जेन्टिनी फूटबल एसोसिएसनले पनि आफ्नो जिम्मेवारी गम्भीरताका साथ वहन गर्नुपर्छ । अचम्म लाग्छ, तर सन् २०१४ को विश्वकपदेखि अहिलेसम्म एसोसिएसनमा चारजना अध्यक्ष परिवर्तन भइसकेका छन् । 

विवादास्पद अध्यक्ष क्लाउडियो तापियाले संसारको सबभन्दा मजबूतमध्ये एक फूटबल राष्ट्रको एसोसिएसन हाँक्ने जिम्मेवारीका लागि आफू योग्य भएको साबित गर्नुपर्नेछ । अनि यो थकित टोलीलाई वास्तविक रूपमा परिवर्तन गराउनु उनको जिम्मेवारी हो । त्यो अवसर सन् २०१४ मा मिस भयो र अब पनि अवसर गुमाउने भूल गर्नुहुँदैन ।

टीमको पुनरुत्थान यात्रामा मेस्सी पनि सहयात्री हुन तयार हुन्छन् भने त्यो अवसर गुमाउनुहुँदैन ।

गोल डट्कममा प्रकाशित डेनियल एडवार्ड्सको विश्लेषण