बुटवल – स्वास्थ्य तथा जनसंख्या मन्त्री उपेन्द्र यादवले नेतृत्व गरेको संघीय समाजवादी फोरम नेपालले मन्त्रालयको निर्देशनको विषयलाई लिएर अस्पताल विकास समितिले विवाद गर्नुपर्ने कुनै कारण नरहेको जनाएको छ ।

लुम्बिनी अञ्चल अस्पताल बुटवलको व्यवसायिक सटर भाडामा लगाउने टेण्डर प्रक्रिया स्थगित गरेको विषयलाई लिएर अस्पताल विकास समितिले अनावश्यक विवाद गरेको भन्दै फोरमले मन्त्रालयको निर्देशन विकास समितिले पालना गर्नुपर्ने दावीसहित धारणा सार्वजनिक गरेको हो ।

रिपोर्टर्स क्लव नेपाल रुपन्देहीले आज बुटवलमा गरेको साक्षात्कार कार्यक्रममा बोल्दै संघीय समाजवादी फोरम नेपाल ५ नम्बर प्रदेश संसदीय दलका उपनेता विजयबहादुर यादवले मन्त्रालयको निर्देशनको विषयलाई लिएर अस्पताल विकास समितिले विवाद गर्नुपर्ने कुनै कारण नरहेको बताए । मुलुक संघीय संरचनामा गइसकेको र अञ्चल अस्पताल प्रदेश सरकार मातहत जाने थाहा हुँदाहुँदै हतारमा अस्पतालको सटर भाडामा लगाउन टेण्डर आह्वान गर्नु जायज नभएको विचार उनले व्यक्त गरे ।

‘अस्पतालले सटर भाडामा दिन आह्वान गरेको टेण्डर मन्त्रालयको निर्देशन अनुरुप अस्पताल प्रशासनले स्थगित गरिसकेको अवस्थामा विघटनको संघारमा रहेको विकास समितिले विवाद गर्नुको औचित्य छैन,’ उनले भने । संघीय समाजवादी फोरम नेपाल ५ नम्बर प्रदेश संसदीय दलकी उपसचेतक सुमन शर्मा रायमाझीले पनि मन्त्रालयको पत्रबारे विवाद गर्नु उपयुक्त नभएको बताइन् ।

साक्षात्कारमा संघीय समाजवादी फोरम नेपाल रुपन्देहीको २ नम्बर क्षेत्रका अध्यक्ष अशोक बर्माले अस्पतालको सटर भाडामा लगाउने टेण्डर प्रक्रिया हचुवाको भरमा नभएको भन्दै सटरमा बस्दै आएका व्यवसायीको आग्रहमा व्यापक छलफलपछि मात्र स्थगित भएको जानकारी गराए । ४ वर्षका लागि सटर भाडामा लिएका व्यवसायी ८२ फिट सडकको मारमा परी सटर भत्काउने र बनाउने समस्यामा परेको भनि तत्कालका लागि टेण्डर स्थगित गर्न मन्त्रालयसँग माग गरेको उनले बताए ।

उनले साउनदेखि अस्पताल प्रदेश सरकार मातहत आउने र उसैले टेण्डर आह्वान गर्ने भएका कारण मन्त्रालयले तत्कालका लागि टेण्डर प्रक्रिया स्थगित गर्ने आशयको पत्राचार गरेको दावी गरे । अस्पताल विकास समितिले सटर भाडामा लगाउन टेण्डर प्रक्रिया अगाडि बढाएको अवस्थामा उपप्रधान तथा स्वास्थ्य एवं जनसंख्या मन्त्री उपेन्द्र यादवका निजी सचिव भवनाथ खतिवडाले अस्पताललाई पत्राचार गरेपछि टेण्डर स्थगित भएको थियो ।

देश प्रादेशिक संरचनामा अगाडि बढिरहेको अवस्थामा अञ्चल अस्पताल सञ्चालन गर्ने, सेवाहरू थप गर्ने र आधिकारिक सेवा प्रवाह गर्ने दायित्व समेत सम्बन्धित प्रदेश सरकारलाई स्वतः जाने हुँदा हाल प्रक्रियामा रहेको व्यावसायिक सटरको टेण्डरको टुंगो पनि प्रदेश सरकारबाट नै लगाउन निर्देशन सहितको पत्र मन्त्रालयले पठाएको थियो । मन्त्रालयको पत्र प्राप्त भएपछि अस्पतालका प्रमुख मेडिकल सुपरिन्टेन्डेन्ट (मेसु) डा. कृष्ण खनालले अर्को सूचना प्रकाशन नहुँदासम्म टेण्डर प्रक्रिया स्थगित भएको सूचना टाँस गरेका थिए । 

अस्पताल प्रशासनले टेण्डर प्रक्रिया स्थगित भएको सूचना टाँस गरेपछि अस्पताल विकास समितिका अध्यक्ष रमेश खनालले पत्रकार सम्मेलन गरेर समितिलाई जानकारी नदिइ टेण्डर प्रक्रिया रोकिएकोमा असन्तुष्टि जनाएका थिए ।