काठमाडौं – छोरा कृष्णप्रसाद अधिकारीका हत्यारालाई कारवाहीको माग गर्दै अनशनरत गोरखाको फुजेलकी गंगामाया अधिकारीले आज अनशन तोडेकी छन् ।

कानूनमन्त्री शेरबहादुर तामाङले गंगामायाको अनशन तोडाएका हुन् । कानूनमन्त्री तामाङले छोराको हत्यामा संलग्नलाई कारवाही गर्ने र परिवारका सदस्यको जीविकोपार्जन लगायतका माग पूरा गर्ने प्रतिवद्धता जनाएपछि गंगामाया अनशन तोड्न राजी भएकी हुन् । उनी काठमाडौंको वीर अस्पतालमा पछिल्लो पटक जेठ महिनादेखि अनशनरत थिइन् ।

मन्त्री तामाङले जुस खुवाएर अनशन तोडाएका हुन् । १० दिनभित्र माग पूरा नभए फेरि अनशन बस्ने गंगामायाले चेतावनी दिएकी छिन् । अनशनरत गंगामायाको स्वास्थ्य अवस्था बिग्रिँदै गएपछि सरकारकै पहलमा फरार अभियुक्त छविलाल पौडेलले गत आइतवार सर्वाेच्च अदालतमा आत्मसमर्पण गरेका थिए । सर्वाेच्चले २०७२ पुस ६ गते पुर्पक्षका लागि थुनामा राखेर मुद्दा प्रक्रिया अगाडि बढाउन आदेश दिएको थियो ।

सर्वाेच्चको आदेशपछि पनि पौडेल फरार रहेकाले अभियुक्तमाथि कारवाही माग गर्दै नन्दप्रसाद अधिकारी र गंगामाया दम्पत्तिले अनशन शुरू गरेका थिए । अनशनकै क्रममा गंगामायाका पति नन्दप्रसादको निधन भएको थियो । परिवारले शव बुझ्न नमानेपछि सरकारले नन्दप्रसादको शव शिक्षण अस्पतालमा राखेको छ ।

छोराका सबै हत्यारा पक्राउ गर्नुपर्ने मुख्य माग राख्दै उनीहरूले अनशन शुरू गरेका थिए । २०६१ जेठ २४ गते गोरखाको फुजेलका कृष्णप्रसादको हत्या भएको थियो । द्वन्द्वकालको घटना भन्दै तत्कालीन माओवादीले सत्य निरुपण तथा मेलमिलाप आयोगमार्फत् घटनाको निरुपण हुनुपर्ने दावी गर्दै आएको छ । तर, मृतकका परिवारले अदालतबाटै न्याय पाउनुपर्ने दावी गर्दै आएका छन् । गंगामाया परिवारलाई मानवअधिकारवादी संघसंस्थाको पनि सहयोग रहेको छ ।