काठमाडौं– इंग्ल्याण्डसँगको दोस्रो एक दिवसीय क्रिकेटमा भारत ८६ रनले पराजित भएको छ । जितसँगै इंग्ल्याण्डले तीन खेलको शृङ्खलामा १–१ को बराबरी गरेको छ ।

लण्डनको लर्ड्स मैदानमा भएको खेलमा इंग्ल्याण्डले प्रस्तुत गरेको ३२३ रनको लक्ष्य पछ्याएको भारतले सबै विकेट गुमााएर मात्रै २३६ रन बनाउन सक्यो ।

पहिले ब्याटिङ्ग गरेको इंग्ल्याण्डले सात विकेटको क्षतिमा ३२२ रन बनाएको थियो । उसका लागि जोए रुटले ११६ बलमा ८ चौका र एक छक्काको सहयोगमा ११३ रन बनाए ।

यस्तै ज्यासन रोयले ४०, डेविड विल्लीले नटआउट ५० तथा कप्तान इयान मोर्गनले ५३ रनको योगदान दिए । इंग्ल्याण्डका लिएम प्लंकेटले चार तथा अदिल रशिद र डेविड विल्लीले समान दुई दुई विकेट लिए । 

भारतका लागि सुरेश रैनाले ४६, कप्तान विराट कोहलीले ४५, महेन्द्र सिंह धोनीले ३७ तथा शिखर धवनले ३६ रनको योगदान दिए पनि हार टार्न सकेनन् ।

यसअघि पहिलो खेलमा भारत ८ विकेटले विजयी भएको थियो । अब अन्तिम एक दिवसीय मंगलबार लिड्समा हुनेछ ।