काठमाडौं – नेपाल कम्युनिष्ट पार्टी (नेकपा) नेतृत्वको सरकारले गरेका कतिपय स्वतन्त्रताविरोधी निर्णय र स्वेच्छाचारी गतिविधिविरुद्ध संसद भवन बानेश्वरअगाडि धर्ना दिन पुगेका करीब २ दर्जन अधिकारकर्मीहरूलाई प्रहरीले पक्राउ गरेको छ ।

मानव अधिकार तथा शान्ति समाजले एक साताको बीचमा गरेको प्रदर्शनका क्रममा यो तेस्रो गिरफ्तारी हो ।

पक्राउ पर्नेमा समाजका संस्थापक सभापति कृष्ण पहाडी, सभापति डा. गंगाधर अधिकारी, सल्लाहकार होमकान्त चौलागाईं, संस्थापक सदस्य कृष्ण कंडेल, उपसभापति रेनुका पौडेल, महासचिव उत्तम पुडासैनी, सचिव बलबहादुर गाहा मगर, कोषाध्यक्ष बटुकृष्ण ढुंगेल, केन्द्रीय सदस्य गिता तिमल्सिना, बाबुहरी आचार्य, काठमाडौं शाखा सभापति रामकृष्ण बराल, विभागीय संयोजकहरू प्रताप पौडेल, बाबुराम न्यौपाने, बीपी पौडेल, सदस्यहरू सनत आचार्य, सरस्वती ढकाल, ईश्वरा लिङ्देन, टिकाराम पौडेल, टंक गैरे, लोकेन्द्र थापा, ईश्वरीप्रसाद नेपाल, रामचन्द्र खतिवडा, नानीकाजी गिरी, मुरारी फुयाल, सुकदेव अधिकारीलगायत छन् ।

धर्नामा बसेकाहरूले सत्याग्रहीको जीवन रक्षा गर, स्वतन्त्रताविरोधी निर्णय खारेज गर, स्वेच्छाचारी गतिविधि बन्द गरजस्ता नारा लेखिएका प्लेकार्ड बोकेका थिए ।