काठमाडौं – कुनै देशको राष्ट्रपतिले आफ्नै जासूसी निकायविरुद्ध गई अर्को देशलाई समर्थन गर्ने कुरा बिरलै मात्र भेटिन्छ । तर अमेरिकाका राष्ट्रपति डोनल्ड ट्रम्पले यस्तै काम गरेका छन् । यसलाई ट्रम्पको आत्मघाती गोलका रूपमा हेरिएको छ ।

फिनल्यान्डको राजधानी हेल्सिन्कीमा रुसका राष्ट्रपति भ्लादिमिर पुटिनसँगको शिखरवार्तापछि ट्रम्पलाई अमेरिकी चुनावमा रुसको हस्तक्षेपका विषयमा प्रश्न गरिएको थियो । उनले एफबीआईलाई नै प्रश्नको कठघरामा उभ्याए । 

ट्रम्पले आफ्नै जासूसी संस्थालाई आलोचना गर्दा अमेरिकामा उनको निन्दा गरिएको छ । 

सन् २०१६ को राष्ट्रपति चुनावका बेलामा रुसले हस्तक्षेप गरेको विषयमा विश्वास गर्नुपर्ने कुनै कारण नरहेको ट्रम्पले बताए । 

ट्रम्प र पुटिनबीचको भेटघाटभन्दा अघि रोबर्ट मुलरको अध्यक्षताको जाँचबुझ समितिले चुनावमा ट्रम्पकी प्रतिद्वन्द्वी हिलारी क्लिन्टन र डेमोक्रेटिक पार्टीको कम्प्युटर सर्भर ह्याक गरेर लीक गरेको आरोप १२ जना रुसी जासूसी अधिकारीमाथि लगाएका थिए ।

हेल्सिन्कीमा ट्रम्पमाथि चुनावको हस्तक्षेप मुद्दा पुटिनसमक्ष उठाउने दबाब थियो । तर उनले बैठकपछिको पत्रकार सम्मेलनमा मस्कोविरुद्ध एक शब्द पनि उच्चारण गरेनन् । उल्टो उनले एफबीआईको अनुसन्धानमाथि नै प्रश्न उठाए ।

पत्रकार सम्मेलनमा ट्रम्पलाई सोधियो, ‘अमेरिका र रुसबीचको खराब सम्बन्धमा मस्को जिम्मेवार छ त ?’ ट्रम्पले उत्तर दिए, ‘दुवै देश जिम्मेवार छन् । अमेरिका मूर्ख थियो, हामी सबै मूर्ख थियौं जस्तो लाग्छ ।’

एजेन्सी