काठमाडौं – अफगानिस्तानमा आतंकवादीहरूविरुद्ध अपरेसन शुरू गरेको १७ वर्षपछि अमेरिकाले तालिबानसँग सीधा वार्ता गर्ने इच्छा देखाएको छ । सन् २००१ को सेप्टेम्बर ११ मा न्युयोर्कको ट्विन टावरमा भएको आक्रमणपछि अमेरिका अफगानिस्तानमा प्रवेश गरेको थियो । 

अहिले चाहिँ अमेरिकाको ट्रम्प प्रशासन तालिबानसँग सीधै वार्ता गर्न तयार देखिन्छ ।

सन् २००१ मा तालिबान सरकारलाई हटाउनका लागि तत्कालीन जर्ज डब्ल्यू बुश सरकारलाई केही महिना मात्र लाग्यो तर तालिबानले लडाईं जारी राख्यो । अफगानिस्तानका १४ भन्दा बढी जिल्ला अर्थात् देशको ४ प्रतिशत भागमा उसको कब्जा छ । त्यति मात्र नभई अन्य २६३ जिल्लामा तालिबान सक्रिय छ ।

अफगानिस्तान–पाकिस्तान सीमा पूरै तालिबानको नियन्त्रणमा छ । अब सीमामा पर्खाल बनाउनका लागि पाकिस्तान ट्रम्प प्रशासनको सहयोग चाहन्छ । पाकिस्तानमा लगातार आतंकवादी आक्रमण भइरहेको छ र सीमापारिबाट आएका
आतंकवादीहरूको यसमा हात भएको ऊ बताउँछ । 

त्यसो त पाकिस्तान आफैं पनि तालिबानलाई सहयोग गर्छ । हक्कानी नेटवर्क भनिने तालिबानको एक खेमालाई पाकिस्तानले सहयोग गर्छ । 

तालिबान र अशरफ गानी नेतृत्वको अफगान सरकारले ईदमा युद्धविरामको घोषणा गरेका थिए । त्यतिखेर आतंकवादी र सैनिकहरूले लिएको सेल्फी चर्चित भएको थियो । तर पछि फेरि युद्ध भयो । 

रुसले तालिबानलाई सहयोग गरिरहेको अमेरिकाको विश्वास छ । तर ट्रम्पले पुटिनमाथि विश्वास देखाएका छन् । ध्यान दिनुपर्ने कुरा के हो भने सोभियत संघ र अफगानिस्तानको युद्ध हुँदा अमेरिकाले मुजाहिद्दीन र तालिबानको समर्थन गरेको थियो । 

एजेन्सी