काठमाडौं– डा. गोविन्द केसीको स्वास्थ्य जटिल बन्दै गएपछि सरकारले काठमाडौं ल्याउने निर्णय गरेको छ । 

प्रधानमन्त्री निवास बालुवाटारमा  बुधबार बसेको नेकपाको  बैठकले केसीलाई काठमाडौं ल्याउने निर्णय गरेको  नेकपाका प्रवक्ता नारायणकाजी श्रेष्ठले जानकारी दिए । 

‘चिकित्सकहरुको सार्वजनिक विज्ञप्तिअनुसार  उहाँलाई सीसीयूसहितको अस्पतालमा राख्नुपर्ने अनिवार्य भइसकेको छ । त्यसैले सबैले उहाँको जीवनरक्षलाई पहिलो प्राथमिकता बनाऔं । त्यसपछि खुला ढंगले मुद्दामा छलफल गरेर समाधान खोजौं ।’ उनले भने । श्रेष्ठले केसी प्रकरणमा  राजनीति गर्न नहुनेमा पनि जोड दिएका छन् । 

 केसीको स्वास्थ गम्भीर भएको भन्दै जुम्लास्थित कर्णाली स्वास्थ्य विज्ञान प्रतिष्ठानले मेडिकल रिपोर्ट दिएपछि नेकपाको बैठक बसेको हो । बैठकको निर्णयअनुसार उनलाई बिहिबार हेलिकप्टरमार्फत काठमाडौं ल्याउने  तयारी गरिएको छ । 

 चिकित्सा क्षेत्रको सुधारका विभिन्न माग राख्दै केसी १९ दिनयता जुम्लामा अनसनरत छन् ।