काठमाडौं–पूर्व प्रधानमन्त्री एवं नेपाली कांग्रेसका सभापति शेरबहादुर देउवा अनशनरत डा. गोविन्द केसीलाई भेट्न त्रिवि शिक्षण अस्पताल पुगेका छन् । 

२१ दिन देखि अनशन बसिरहेका डा. केसीलाई विहीवार(हिजो) जुम्लाबाट काठमाडौं ल्याइएपछि देउवा केसीलाई भेट्न शुक्रवार(आज) अस्पताल पुगेका हुन् । 

अस्पताल पुगेका देउवाले डा. केसीको स्वास्थ्य अवस्था बारे जानकारी लिए । स्वास्थ्य अवस्था निकै कमजोर भएका कारण आफूसँग डा. केसीले बोल्न खोजेपनि बोल्न नसकेको देउवाले बताएका छन् । 

डा. केसीलाई भेटेपछि देउवाले भने–‘लोकतन्त्रमा एक जना नागरिक पनि निकै बलियो हुन्छ । तर डा.केसीको पछाडि हामी लाखौ छौ ।’

देउवाले डा. केसीसँग तत्काल वार्ता गरेर उनको माग सम्बोधन गर्दै जीवन बचाउन सरकारसँग माग गरेका छन् ।