सानै उमेरदेखि अभिनय तथा नृत्यमा रुचि राख्ने नव मोडल अमिर खान भबिष्यमा एक कुशल चर्चित मोडल तथा नायक बन्ने सोच लिएर यस क्षेत्रमा प्रवेश गरेका छन्  । जसका लागि उनले मेहनत गरिरहेका छन् ।

वैदेशिक रोजगारीको लागि युएई रहेका स्याङ्जाका अमिर खानले विगत केही समयदेखि हिट म्युजिक भिडियो दिँदै आइरहेका छन् ।

मोडलिङ क्षेत्र आफैमा एउटा राम्रो र सम्भाबना बोकेको क्षेत्र हो, जहाँबाट एउटा कलाकारले राम्रो अवसर पाउने माध्यम हो, अभिनय र नृत्य बिधामा राम्रा सम्भावना बोकेका कलाकारहरुले यसैको माध्यमबाट विभिन्न अवसरहरु पनि पाईरहेको हुन्छन भने देश विदेशको यात्रा गर्दै संसारमा चर्चित हुने अवसर पनि जुटाईरहेका हुन्छन ।

वैदेशिक रोजगारको लागि आठ वर्ष अघि युएई छिरेका अमिर खान शुरु शुरुमा आफ्नो सौखको कारणले म्युजिक भिडियोहरू गर्न लागेका थिए, पछि यही क्षेत्रमा क्यारियर बनाउन सकिने सम्भावनाले उनलाई खुसी दिइरहेको छ । हाल उनले ‘नाचन मैच्याङ’ नामको म्युजिक भिडियो सार्वजनिक गरेका छन् ।

आफैले निर्माण गरेको उक्त म्युजिक भिडियोमा अमिर आफैं खेलेका छन् र आफ्नो साथमा सुमी खड्कालाई नचाएका छन् । प्रतिक बलोन तामाङको शब्द, स्वर र संगीतमा सजिएको ‘नाचन मैच्याङ’ भन्ने उक्त गीत संयुक्त अरब इमिरेट्सको अबुधाविमा सुटिङ गरिएको गीत हो । गीत ‘पीक डिजिटल रेकर्डिङ’मा रेकर्ड गरिएको छ । गीतको लय, भाका त सुन्दर छ नै, साथसाथै भिडियोमा प्रस्तुत गरिएको प्राकृतिक दृश्य पनि मनोरम र सुन्दर छ । यो भन्दा अगाडि दुईवटा म्युजिक भिडियोमा सफलतापूर्वक काम गरिसकेका खानलाई पारिवारिक पृष्ठभुमीले शुरुमा साथ दिएको थिएन । तर जब उनले काम मोडलिङ गरेका म्युजिक भिडियोहरू सफल भए त्यसपछि आफ्नो लागि अनुकुल वातावरण सृजना भएको खानको भनाई छ । यो क्षेत्रमा आउनको लागि युएईमै म्युजिक भिडियोहरू उत्पादन गर्ने पेशामा लागेका रोहित विक्रम कार्कीले प्रेरणादायी भूमिका खेलेको खान बताउँछन् ।

‘सुन्दै छु म’ भन्ने गीतमा बनेको खानको पहिलो म्युजिक भिडियो र ‘सबै भन्दा’ भन्ने अर्को गीतमा बनेको म्युजिक भिडियोको निर्देशन कार्कीले गरेका थिए । कार्कीको प्रेरणाले आफू जिन्दगीमा अझै अघि बढ्न सक्ने आत्मविश्वास खानमा रहेको छ ।

पछिल्लो समयमा नयाँ पुस्ताका युवा युवतिहरु पनि यसै क्षेत्रमा धेरै आईरहेको पाईन्छ। धेरै सफल पनि भैरहेका छ्न् भने कोहि क्षणीक अबधि पछि यो क्षेत्रबाट हराईरहेका छन । मोडलिङ क्षेत्रमा प्रसस्त सम्भाबनाहरु रहेका छन् भने क्षमतावान तथा कला भएकाहरुको लागि आफु चर्चित हुने राम्रो मध्यम पनि हो । वास्तवमा कलाकारितामा एउटा रहर मात्र होइन, जहाँ गर्न सके पनि नाम र दाम दुबै कमाउन सकिन्छ । त्यसैले पनि मोडलिङ वा कलाकारितालाई धेरैले आफ्नो रुचि र इच्छाको रुपमा लिएको पाइन्छ ।