काठमाडौं – एनआईसी एसिया बैंक लिमिटेडले ‘क्यूआर कोड पेमेन्ट’ मार्फत् भुक्तानी प्रदान गर्ने सेवा शुरू गरेको छ ।

शहरी तथा ग्रामीण क्षेत्रमा सशक्त उपस्थिति स्थापित गर्दै बैंकले विद्युतीय प्रविधि प्रयोग गरी विभिन्न डिजिटल बैंकिङ्ग सेवा प्रदान गर्दै आइरहेकोे छ । बैंकको ‘क्यूआर कोड पेमेन्ट’ सेवा मोबाइल बैंकिङ्ग एप प्रयोगकर्ताले प्रयोग गर्न सक्ने छन् ।

एनआईसी एसिया बैंक ‘क्यूआर कोड पेमेन्ट’ सेवा नेपालमा पहिलो पटक शुरू गर्ने बैंक भएको छ । सेवा प्रयोग गर्न ग्राहकसँग स्मार्ट फोन उपलब्ध हुनुपर्ने र स्मार्ट फोन प्रयोग गरी ग्राहकले सजिलै भुक्तानी गर्न सक्ने छन् । बैंकको मोबाइल बैंकिङ्ग सेवा गुगल प्ले, एप स्टोर वा बैंकको वेवसाइटबाट सजिलै डाउनलोड गर्न सकिने बैंकका सहायक प्रमुख कार्यकारी अधिकृत तथा सूचना अधिकारी सुधिरनाथ पाण्डेले बताए ।

सर्वसाधारणले गरेको भरोसाले गर्दा मुलुकभर २ सय ३३ शाखा, २ सय २१ एटीएम, १४ वटा एक्सटेन्सन काउन्टर र १५ वटा शाखारहित बैंकिङ्ग इकाइमार्फत् सेवा प्रदान गरेर मुलुककै सबैभन्दा ठूलो शाखा सञ्जाल भएको बैंक हुन सफल भएको छ । 

बैंकको वासलातको आकार १ सय ७४ अर्ब रुपैयाँभन्दा बढी पुगेको छ भने निक्षेप करीब १ सय ४९ अर्ब रुपैयाँ पुगेर निजी क्षेत्रबाट स्थापित बैंकमध्ये नेपालको सबैभन्दा ठूलो बैंक बनेको छ । कर्जातिर करीब १ सय २० अर्ब रुपैयाँसहित निजी क्षेत्रका बैंकमध्ये दोस्रो ठूलो बैंकको रुपमा आफ्नो पहिचान बनाउन सफल भइसकेको छ ।

बैंकमा ग्राहकको संख्या करीब ११ लाख ७५ हजार रहेको छ । संस्थागत सुशासन, जोखिम व्यवस्थापन र आन्तरिक नियन्त्रण प्रणालीको उत्कृष्ट अभ्यासलाई बैंकले पालना गर्दै आएको सूचना अधिकारी पाण्डेले बताए ।