काठमाडौं — चीनबाट नेपालमा रेल जोड्ने कुरा राष्ट्रिय राजनीतिमा मात्र सीमित छैन्, कवि कलाकारले समेत चाइनाको रेललाई बिम्ब बनाएर गीत र प्यारोडी निकालेका छन् ।

नेपालले चीनसँग रेल्वे विस्तारसम्बन्धी सम्झौता गरेपछि २०७५ सालका तीज र गाइजात्रे गीत रेलमय भएका छन् । गायिका सरु गौतमले तीजको गीत बजारमा ल्याएकी छन्— ‘चाइनाको रेल’ ।

गौतमको गीतमा यसरी गरिएको छ रेलको चर्चा–

सपना देखें, चाइनाको रेल काठमाडौं हुँदै गुड्यो बरिलै,
इन्डियाको कुर्ता, चाइनाको साडी नेपालमा धुलो उड्यो बरिलै ।।

यस्तै कलाकार रमा थापाले पनि रेलको प्रसंगमै तीजको गीत बजारमा ल्याएकी छिन् । रमा थापाको तीज गीतमा यसरी गरिएको छ रेलको चर्चा– 

माइत जान्छु तीजको बेलैमा,
केपीबाले ल्याएको रेलैमा ।

हास्य कलाकार कमल गाउँलेले पनि ‘चाइनाको रेल’ नामक कमेडी बजारमा लिएर आएका छन् ।

गाइजात्राको अवसरमा हरेक वर्ष प्यारोडी गीत निकाल्दै आएका गाउँलेले यसपटक चाइनाको रेलको बारेमा गीत गाएका छन् ।

प्रधानमन्त्री केपी शर्मा ओलीको चीन भ्रमणका क्रममा केरुङदेखि काठमाडौंसम्म इलेक्ट्रिक रेल ल्याउने सहमति भएको थियो ।

ओली पहिलोपटक प्रधानमन्त्री बनेर चीन भ्रमणमा गएर फर्केपछि चाइनाको तेल –इन्धन)को विषयमा यस्तै गीत बनेका थिए ।