काठमाडौं – प्रतिनिधिसभा बैठकमा मंगलवार नेपाल नागरिकता (पहिलो संशोधन) विधेयक- २०७५ माथिको सैद्धान्तिक छलफलमा उठेका प्रश्नको गृहमन्त्री रामबहादुर थापाले जवाफ दिएपछि सभामुख कृष्णबहादुर महराले विधेयकमाथि विचार गरियोस् भन्ने प्रस्ताव पेश गर्न लागेका थिए ।

नेमकिपा सांसद प्रेम सुवालले संसदको गणपूरक संख्या गनेर मात्र निर्णयार्थ पेश गर्न माग गरे ।

सुवालले माग गरेपछि संसद सचिवालयका कर्मचारीले सांसदको संख्या गने । तर गणपूरक संख्या पुगेको देखिएन ।

त्यसपछि सभामुख महराले ५ मिनेट जनाउ घण्टी बजाउन आदेश दिए । घण्टी बजेको केही समयमा सांसदहरू बैठक कक्षमा आए ।

सभामुखले प्रस्ताव निर्णयार्थ पेश गरे र  बहुमत सांसद पक्षमा रहेको भन्दै विधेकय स्वीकृत भएको घोषणा गरे ।

बैठकमा कुनै प्रस्ताव निणयार्थ पेश गर्दा संसदमा कायम सदस्यको एक चौथाइ आवश्यक पर्ने हुन्छ । सुवालले बैठकमा कति सांसद् छन भन्ने जान्न चाहे ।

सभामुख महराले गणपूरक संख्याका लागि ५९ जना सांसद आवश्यक हुनुपर्नेमा ८१ जना सांसद उपस्थित रहेको जानकारी गराए र बैठक सुचारु भयो ।

सांसदहरू संसदमा हाजिर भएर बाहिरिने गरेपछि बैठकमा गणपूरक संख्या पुर्‍याउन कठिन गर्ने गरेको छ ।

प्रतिनिधिसभामा अहिले २ सय ७५ सांसद छन् ।

पढ्नुहोस यो पनि :

गिनिज बूकमा नाम लेखाउन मन्त्रीले गरेको प्रस्ताव किन गरे सुवालले अस्वीकार ?