काठमाडौं – माछापुच्छ्रे बैंक लिमिटेडले मुस्ताङमा ४ शाखारहित बैंकिङ्ग सेवा सञ्चालनमा ल्याएको छ ।

बैंकले मुस्ताङको मार्फा, कागबेनी, लेते र लोमन्थाङ्ग गरी ४ शाखारहित बैकिङ्ग सेवा सञ्चालनमा ल्याएको छ । योसहित माछापुच्छ्रे बैंक लिमिटेडको हालसम्म २५ शाखारहित बैंकिङ्ग सेवा सुचारु भइसकेको बैंकले जनाएको छ ।

ग्राहक सेवा केन्द्रको रुपमा सञ्चालित शाखारहित सेवा केन्द्रबाट खाता खोल्ने, रकम जम्मा गर्ने र झिक्ने, रेमिट्यान्स भुक्तानी तथा कर्जा आवेदन गर्ने समेत व्यवस्था गरिएको छ । बैंकले नेपालमै पहिलो पटक तुरुन्त खाता खोल्ने व्यवस्था गरेको छ भने चीपमा आधारित डेबिट कार्ड पनि तुरुन्त उपलब्ध गराएको छ ।

बैंकले झापादेखि कञ्चनपुरका साथै हिमालदेखि पहाड, र तराईसम्म ८६ वटा शाखा, २ एक्स्टेन्सन काउन्टर र २५ शाखारहित बैकिङ्ग सेवा गरी १ सय १३ स्थानबाट ग्राहक महानुभावलाई बैंकिङ सुविधा प्रदान गरिरहेको छ । बैंकका देशभर ९९ वटा एटीएम सञ्चालनमा छन् ।