काठमाडौं – गायक बमबहादुर कार्कीले केही वर्षअघि एउटा गीत गाएका थिए, जसले वाग्मती नदीको दूरावस्थालाई चित्रण गरेको थियो । 

'वाग्मती भयो गह्नाउने,
पशुपतिको छेवैमा बसेर बाँदरेले लुतो कन्याउने ।।'

यो गीतमा भनिएजस्तै केही वर्ष अघिसम्म वाग्मतीको अवस्था नाजुक थियो । तर पूर्वमुख्यसचिव लिलामणि पौडेलको नेतृत्वमा शुरु भएको वाग्मती सफाइले वाग्मती नदीको स्वरूप फेरिएको छ ।

कञ्चन नभए पनि वाग्मती सफा हुँदै गएको छ । ढलको मिसावट रोकिएको छ । 

पूर्वमुख्य सचिव एवं हाल चीनका लागि नेपाली राजदूत लीलामणि पौड्यालको विशेष अग्रसरतामा वाग्मती सफाइ अभियान शुरू गरिएको थियो ।

त्यसपछि विभिन्न संघसंस्था र अभियान्ताहरूले नदी सरसफाइ गर्दै आएका छन् ।

वाग्मती करिडोरमा बगैँचा र वृक्षारोपणको काम भइरहेको छ । कुनै समय झाडी र गाँजाको बुट्यान पाइने वाग्मती किनारमा आजभोलि बगैँचा बनाउने काम भइरहेको छ । 

दशकौंपछि वाग्मतीले फेरि पुनर्जीवन पाउने सम्भावना बढेर गएको छ ।