काठमाडौं – महसञ्चारको ब्यानरमा दाल, भात तरकारी 'पाक्ने' भएको छ । यो ब्यानरले निकै अचम्मको नाम सापट लिएर चलचित्र निर्माण गर्न लागेको हो ।

किरण केसी प्रस्तुतकर्ता रहने चलचित्रको काठमाडौंमा एक कार्यक्रमको आयोजना गरी औपचारिक निर्माण घोषणा गरेको छ ।

चलचित्रलाई निर्माता तथा कलाकार किरण केसीका छोरा सुदन केसीले निर्देशन गर्नेछन् ।

यसअघि उनले दुई हलिउड चलचित्रमा सह–निर्देशकको रूपमा काम गरिसकेका छन् । यद्यपि उनले पहिलोपटक नेपाली चलचित्रको निर्देशन गर्न लागेका हुन् ।

दाल, भात, तरकारीमा मल्टीस्टारर कलाकारहरूको बाहुल्यता रहने बताइएको छ, जहाँ मदनकृष्ण श्रेष्ठ, हरिवंश आचार्य, निरुता सिंह, प्रियंका कार्की, पुष्पल खड्का, स्वस्तिमा खड्का, वर्षा राउत, बसुन्धारा भुषाल, विल्सनविक्रम राई, राजाराम पौडेल, यमन श्रेष्ठ, शिवहरी पौडेल, किरण केसीलगायतका कलाकारको अभिनय रहनेछ ।

मंसिर पहिलो साताबाट चलचित्रको छायांकन शुरू हुने पत्रकार सम्मेलनमा जानकारी गराइयो ।

पत्रकार सम्मेलनमा वर्ष २०७६ को वैशाख १३ गतेलाई प्रदर्शन मिति घोषणा गरिएको चलचित्रले हरेक मानिसले दाल भात तरकारी खानका लागि गर्ने संघर्षको कथा बोल्ने समेत बताइयो ।

चलचित्रको कथा हरिवंश आचार्यले लेखेका हुन् । शम्भुजित बाँस्कोटाको संगीत रहने चलचित्रका गीत हरिवंश आफैंले लेखेका हुन् ।

मित्र डी गुरुङको सम्पादन रहने चलचित्रलाई दीर्घ गुरुङले खिच्नेछन् । कविराज गहतराजको कोरियोग्राफी रहने यो चलचित्रमा प्रमिला आचार्य, यमन श्रेष्ठ, नरेन्द्र कंशाकार, शिवहरी पौडेल, राजाराम पौडेल, दीर्घ गुरुङ, अनुराग कुँवर, विल्सन विक्रम राई, दीपेन्द्र खनियाँ र सुमित मैनाली निर्मातामा रहेका छन् ।