विराटनगर– साढे ३३ किलोसहितको ३८ क्विन्टल सुन तस्करी प्रकरणमा जिल्ला अदालत मोरङको आदेशविरुद्ध अदालती बन्दोबस्तीको १७ नम्बर महलअन्तर्गत उच्च अदालत विराटनगर गएकामध्ये बिहीवार ३ जनाको सुनुवाइ भएको छ । 

उच्च अदालत विराटनगरका मूख्य न्यायाधीश कुलरत्न भुर्तेल र न्यायाधीश उमेश कुमार सिंहको इजलाशमा सुनकाण्डका प्रतिवादी पुण्यप्रसाद लामा (तामाङ) र सम्विर प्रसाद तोलाङ्गेको सुनुवाइ भएको हो भने न्यायाधीशद्वय हरिप्रसाद भण्डारी र ऋषिराम दवाडीकाे स‌ंयुक्त इजलाशमा राजन कुमारकाे सुनुवाइ भयाे । उच्च अदालतले उनीहरुको हकमा मोरङ जिल्ला अदालतले जारी गरेको आदेशलाई सदर गरेको छ । 

मोरङ जिल्ला अदालतले अपराधिक समूह स्थापना र संचलान गरी सुन चोरी पैठारी तथा निकासीको अवैध कारोवार, अपहरण तथा शरीर बन्धक र कर्तव्य ज्यान मुद्दाको पुर्पक्षका लागि उनीहरुलाई जेल चलान गर्न आदेश जारी गरेको थियो । 

उच्च अदालत विराटनगरले सोही मुद्दाको पुर्पक्षका लागि जिल्ला अदालत मोरङको आदेशअनुसार जेल चलान भएका गोविन्द निरौला, दिवेश लोहनी, विकासराज खनाल, सञ्जय राउत र हेमन्त गौतमको हकमा भने छुट्टा–छुट्टै कैफियत प्रतिवेदन माग्न आदेश दिएको छ । उच्च अदालतले प्रतिवादीहरुलाई पुर्पक्षका लागि जेल चलान गर्न जिल्ला अदालतले जारी गरेको आदेशको आधारसहितको छुट्टा–छुट्टै कैफियत फाइल मगाएको हो । 

बिहीवार भएको बहसमा सरकारी वकिलको तर्फबाट जिल्ला सरकारी वकिलकाे कार्यालयका जिल्ला न्यायाधिबक्ता पुण्य पाठक, सहायक जिल्ला न्यायाधिवक्ता पदम वस्ती र रोहित पोखरेलले बसह गरेका थिए । सरकारी वकिलको तर्फबाट ३० वटै कैफियत प्रतिबेदनको तर्फबाट बहस गर्नको लागि ८ जना सरकारी वकिलहरुलाई तयारी अबस्थामा राखिएको भए पनि पेशीमा चढेका सबै निवेदन प्रतिवादीका वकिलले निवेदन दिएर स्थगित गराएको उच्च सरकारी विकल चिरन्जीबि पराजुलीले बताए । उच्च अदालतमा सरकारी वकिलहरु चिरन्जीबि पराजुलीसहित उप न्यायाधिवक्ता राजेन्द्र सिंह भण्डारी, जिल्ला न्यायाधिवक्ता पुण्यप्रसाद पाठक, उच्च अदालतका विराटनगरका शाखा अधिकृत पुण्य सापकोटा र पुष्पराज बाँस्तोला, जिल्ला सरकारी वकिल कार्यालयका सहायक जिल्ला न्यायाधिवक्ता पदम वस्ती, रोहित पोखरेल तथा धनकुटा जिल्ला सरकारी वकिल कार्यालयका सहायक जिल्ला न्यायाधिवक्ता मनोज आचार्यले बहस गर्नेछन् ।

तस्करीको साढे ३३ किलोसहितको ३८ क्विन्टल सुन तस्करी प्रकरणमा जिल्ला अदालतको आदेशअनुसार थुनामा रहेका मूख्य अभियुक्त गोरे भनिने चूडामणि उप्रेती, छिरिङ वाङ्गेल, नरेन्द्र कार्की र मोहन काफ्लेबाहेकका सबै प्रतिवादीले उच्च अदालत विराटनगरमा अदालती बन्दोबस्तीको १७ नम्बर महलअन्तर्गत पुनरावलोकन निवेदन दिएका थिए ।