मुम्बइ – आयकर पुनरावेदन अदालन (आईटीएटी) को मुम्बइ इजलासले आयकरसम्बन्धी मुद्दामा पूर्वक्रिकेटर सचिन तेन्दुल्करको पक्षमा फैसला सुनाएको छ ।

आईटीएटीले आर्थिक वर्ष सन् २०१२/०१३ मा सचिनको पुणेस्थित एक फ्ल्याटबाट हुने आम्दानीलाई 'शुन्य' मानेको छ, ताकि अब सचिनले यसबापत कुनै कर तिर्नुपर्दैन ।

आईटीएटीले सचिनको पुणेस्थित फ्ल्याटबाट वर्षमा हुने अनुमानित १ लाख ३० हजार भारु. आम्दानीलाई गणना नगर्ने फैसला गरेको छ । 

अदालतमा बयानका क्रममा सचिनले भनेका थिए– सो वर्ष फ्ल्याट भाडामा दिनका लागि उनले कुनै भाडावाल पाएनन् ।

यदि एक आर्थिक वर्षभरि कुनै भौतिक सम्पत्ति खाली रहन्छ भने करदातालाई भ्याकेन्सी अलाउन्सका रूपमा कर छुट दिने व्यवस्था भारतमा छ ।

उक्त वर्ष सचिनको कुल कमाइ ६१ करोड २३ लाख भारु थियो । उनले तिरेको कर आयको तुलनामा कम भएको भन्दै मुद्दा परेको थियो ।

भारतीय आयकर कानूनअनुसार यदि कुनै व्यक्तिसँग एकभन्दा बढी घर छ र कुनै एक घर आफैँ बस्नका लागि प्रयोग गर्छ भने उसले त्यसबापत कर तिर्नुपर्दैन ।