काठमाडौं – माछापुच्छ्रे बैंकले शुक्रवार नियुक्त गरेका ‘ब्रान्ड एम्बेसडर’ सार्वजनिक गरेको छ ।

खेलकुद क्षेत्रका उदीयमान नाम मिरा राई, प्रतिमा शेर्पा र आर्यन गिरीलाई बैंकको ब्रान्ड एम्बेसडर नियुक्त गरेको छ । बैंकले गरेको पत्रकार सम्मेलनमा मिरा राई, प्रतिमा शेर्पा र आर्यन गिरीले क्रमशः आफ्नो यात्रा, कठिनाइ, चुनौती, सफलता र भावी योजनाबारे मन्तव्य राखेका थिए ।

नेपाली म्याराथनमा स्थापित मिरा राईले विभिन्न अल्ट्रा म्याराथन खेलमा सहभागिता जनाउँदै थुप्र्रै उपाधि जितेकी छन् । मिरा राईले सन् २०१५ मा फ्रान्समा सम्पन्न ८० किलोमिटर विश्व म्याराथनमा पहिलो स्थान हासिल गर्न सफल भएकी थिइन् ।

विश्व अल्ट्रा म्याराथनमा स्थापित नेपाली धाविका मिरा राईले नेसनल ज्योग्राफिकले २०१७ मा सार्वजनिक गरेको ‘एड्भेन्चर अफ द इयर’को उपाधि समेत जित्न सफल भएकी थिइन् ।

प्रतिमा शेर्पा नेपालको नम्बर १ महिला गल्फर हुन् । रोयल नेपाल गल्फ क्लबमा हुर्केकी शेर्पाले १५ वर्षकै उमेरदेखि खेलको प्रशिक्षण लिन थालेकी हुन् । सानो उमेरमै लगातार उपाधि जित्न सफल भएपछि उनको चर्चा स्वदेशमा मात्र नभएर विदेशी मिडियामा पनि भएपछि उनले पूर्व विश्व नम्बर १ टाईगर उड्सलाई समेत भेट्ने अवसर प्राप्त गरेकी थिइन् । उनको २ महिने अमेरिका भ्रमणका दौरान ईसपीएनले उनीमाथि वृत्तचित्र समेत निर्माण गरेको थियो ।

आर्यन गिरी १३ वर्षीय उदीयमान टेनिस खेलाडी हुन् । ६ वर्षको कलिलै उमेरदेखि टेनिस शुरू गरेका गिरी जुझारु खेलाडी हुन् । उनी नेपाल अन्डर १४ को नम्बर १ र एसिया अन्डर १४ मा नम्बर २९ स्थान बनाउन सफल खेलाडी भए । उनले मेहनत र परिश्रमले एसियाकै नम्बर १ हुने लक्ष्य राखेका छन् ।

पत्रकार सम्मेलनमा बैंकका प्रमुख कार्यकारी अधिकृत सुमन शर्माले मिरा राई, प्रतिमा शेर्पा र आर्यन गिरी जस्ता खेलाडीलाई बैंकसँग आवद्घ गर्न पाउनु गौरवको विषय रहेको बताए । बैंकका पूर्वअध्यक्ष तथा पूर्वसांसद डा. वीरेन्द्रप्रसाद महतोले बैंकले नियुक्त गरेका ब्रान्ड एम्बेसडरले बैंकलाई अझै उचाइमा पुर्याउनेमा आफू विश्वस्त रहेको बताए । बैंकका अध्यक्ष रोशन केसीले पनि आफ्नो मन्तव्यमा मिरा राई, प्रतिमा शेर्पा र आर्यन गिरीलाई माछापुच्छ्रे बैंकको सदस्यका रुपमा स्वागत गरे ।

बैंकले देशभर ८६ शाखा, २ एक्स्टेन्सन काउन्टर, ९९ एटीएम, २५ शाखारहित बैकिङ्ग सेवा गरी १ सय १३ स्थानबाट ग्राहकलाई बैंकिङ्ग सुविधा प्रदान गरिरहेको छ ।