बुटवल – भैरहवामा निर्माणाधीन गौतमबुद्ध अन्तर्राष्ट्रिय विमानस्थल आयोजना प्रमुखको सरुवा भएको छ ।

आयोजना प्रमुख ओम शर्माको सरूवासँगै विमानस्थल निर्माणको काम समयमै सम्पन्न हुनेमा आशंका उब्जिएको छ ।

सन् २०१९ जुनभित्रै निर्माण सम्पन्न गरी सञ्चालनमा ल्याउने उद्देश्यसहित निर्माणाधीन कार्यलाई तीव्र बनाएको समयमा एक्कासि आयोजना प्रमुख शर्मालाई सरुवा गरिएपछि विमानस्थल समयमा निर्माण सम्पन्न हुनेमा शंका उब्जिएको हो ।

हालै नेपाल नागरिक उड्डयन प्राधिकरणले शर्मालाई बाराको निजगढ विमानस्थल आयोजनामा सरूवा गरेको हो । डिसेम्बर २०१७ मा निर्माण सम्पन्न गर्ने गरी १३ नोभेम्बर २०१४ मा सम्झौता गरिएको विमानस्थलको निर्माण कार्य जनवरी २०१५ मा शुरू गरिएको थियो ।

शर्मा विमानस्थल शिलन्यासदेखि नै कार्यरत थिए । विमानस्थलको २०७१ माघ १ गते तत्कालीन प्रधानमन्त्री तथा नेपाली कांग्रेसका सभापति स्व. सुशील कोइरालाले शिलान्यास गरेका थिए । 

नाकाबन्दी, तराईको आन्दोलन, भूकम्प तथा स्थानीय पेटी ठेकेदार र जग्गाधनीको आन्दोलनका कारण सुस्त बनेको विमानस्थल निर्माण कार्यले सबै समस्या समाधान भई गति लिएका बेला आयोजना प्रमुख शर्माको सरुवा भएको हो । 

स्थानीयलाई मुआब्जा वितरणमा पटक–पटक देखिएको समस्या शर्माले समाधान गरी कामलाई तीव्रताका साथ अगाडि बढाएका थिए । अहिले विमानस्थल निर्माणको काम झण्डै ६० प्रतिशत सकिएको छ  । उनको सरुवाप्रति भैरहवावासीले असन्तुष्टि जनाएका छन् ।

शर्मासँग सम्पर्क गर्न खोज्दा उनी सम्पर्कमा आएनन् ।

दक्षिण एशियाकै पर्यटन प्रवद्र्धनका लागि भौतिक पूर्वाधार आयोजनाअन्तर्गत एसियाली विकास बैंकको अनुदान तथा कर्जामा गौतमबुद्ध विमानस्थलको स्तरोन्नति गर्न नेपाल सरकारले चिनियाँ कम्पनी नर्थवेस्ट सिभिल एभिएसन विमानस्थल निर्माण समूहलाई ग्लोबल टेन्डरमार्फत ठेक्का दिएको थियो ।