काठमाडौं — भारतका छिमेकी देशहरूबाट चुनौती प्राप्त भइरहेको सन्दर्भमा भुटानबाट पनि चिन्ता हुनसक्ने भारतीय पत्रिका नवभारत टाइम्सले छापेको छ । 

भुटानमा भारतसमर्थित पिपुल्स डेमोक्रेटिक पार्टी चुनावमा पछि परेको छ र यो भारतका लागि शुभ संकेत होइन । उक्त पार्टीका प्रमुख तथा बहालवाला प्रधानमन्त्री छिरिङ तोग्बे भारतप्रति उदार र सहयोगी परराष्ट्रनीतिका लागि परिचित छन् । 

तर भुटानमा भएको चुनावको पहिलो चरणमा उनको दल पछि पेर तेस्रो स्थानमा आइपुगेको छ । ड्रुक न्यामरूप शोग्बा (डीएनटी) पार्टी पहिलो स्थानमा छ । प्रमुख विपक्षी दल ड्रुक फुएनशुम शोग्बा (डीपीटी) दोस्रो स्थानमा छ 

यी दुई दलबीच अन्तिम परिणामका लागि अक्टोबर १८ मा प्रतिस्पर्धा हुने भएको छ । 

डीपीटीको पार्टी लाइन चीनप्रति झुकाव राख्छ । पार्टीको घोषणापत्रमा पनि देशको ८० प्रतिशतभन्दा बढी उत्पादन भारतमा निर्यात भएका कारण अर्थव्यवस्थामा नोक्सानी भइरहेको लेखिएको छ । 

नयाँ दिल्लीले यो चुनाव परिणामका विषयमा औपचारिक टिप्पणी गरिसकेको छैन । 

सन् २०१३ मा भएको आमनिर्वाचनमा भारत एक प्रमुख तत्त्व थियो तर यसपालि भारतको खासै भूमिका देखिएन । पोहोर साल दोक्लम विवाद आएको भएपनि भारतले चुनावमा खासै प्रभाव पारेको छैन । 

डीपीटीसँग भारतको खासै राम्रो सम्बन्ध छैन । ऊ सत्तामा छँदा भारतले भुटानमा खाना पकाउने ग्यासको अभाव गराइदिएको थियो र डीपीटीलाई हराउन भूमिका खेलेको थियो । तर त्यसले गर्दा भुटानमा भारतप्रतिको छवि धूमिल भएको थियो । 

बहालवाला प्रधानमन्त्री छिरिङ तोब्गे र उनको पीडीपी दलले हार स्वीकार गरिसकेको छ । 

डीएनटीले १६ क्षेत्रमा विजय प्राप्त गरेको छ भने डीपीटीले २२ ठाउँ जितेको छ । डीपीटीले पूर्वी भुटानमा आश्चर्यजनक जीत ल्यायो । पीडीपीले उक्त क्षेत्रमा हार बेहोरेर चुनाव गुमाएको हुनसक्छ । 

डीएनटी र डीपीटी दुवै दक्षिणपन्थी दल हुन् तर डीएनटीको बारेमा धेरै थाहा छैन । त्यो दल लोते छिरिङ र उनका दुई साथी मिलेर ६ महिनाअघि गठन गरेका हुन् । घोषणापत्र हेर्दा त्यो दल हल्का वामपन्थी देखिन्छ र त्यसमा स्वास्थ्य,
सामाजिक विषय तथा अर्थतन्त्र समेटिएका छन् ।

द टाइम्स अफ इन्डियाबाट