काठमाडौं – प्रमुख प्रतिपक्षी दल नेपाली कांग्रेसका एक सांसदले संविधान संशोधन गरेर देशमा दुईवटा प्रधानमन्त्री राख्ने व्यवस्था गर्न प्रमुख सत्तारुढ दल नेकपालाई सुझाव दिएका छन् ।

प्रतिनिधिसभाको सोमवार बसेको बैठकको शून्य समयमा नेपाली कांग्रेसका सांसद भरत शाहले सरकारले नेपाल वायुसेवा निगममा कार्यकारी महाप्रबन्धक हुँदाहुँदै कार्यकारी अध्यक्ष नियुक्त गरेकोप्रति व्यंग्य गरेका हुन् ।

‘हालसालै नेपाल सरकारले नेपाल वायुसेवा निगमको कार्यकारी अध्यक्षमा मदन खरेललाई नियुक्त गरेको छ, कस्तो विडम्बना ? एउटै संस्थाका अर्को कार्यकारी अध्यक्ष हुन सक्दैन । कही पनि हुँदैनन्’ शाहले व्यंग गर्दै भने, ‘हुन त उहाँको आदत लागिसक्यो एउटै पार्टीमा दुईवटा अध्यक्ष राख्नै दुबै कार्यकारी पनि हो, अब के गर्नु हुन्छ ? संसदमा दुई तिहाइ पनि छ संविधान बदलेर दुईवटा प्रधानमन्त्री राख्ने हो कि ?’

कांग्रेस सांसदले सरकारप्रति व्यंग्य गर्दा सभामुख कृष्णबहादुर महरा समेत हाँसेका थिए ।