जनकपुरधाम – सीके राउतका मुख्य सहयोगी सत्यनारायण मण्डललाई धनुषा प्रहरीले पक्राउ गरेको छ ।

प्रहरी स्रोतले दिएको जानकारी अनुसार मंगलबार दिउँसो सवा २ बजे मण्डललाई पक्राउ गरिएको हो । जनकपुर उपमहानगरपालिका–८ स्थित प्रहरी चौकी बलबाटोलबाट खटिएको सुरक्षाकर्मीले राउतका सहयोगी मण्डललाई उनको घरबाटै पक्राउ गरेको हो ।

मण्डल राउतका प्रमुख सहयोगी हुन् । राउतका स्वकीय सचिवको भूमिकामा मण्डल काम गर्दै आइरहेका थिए । पक्राउ परेका मण्डलसँग राउतबारे प्रहरीले सोधपुछ गरिरहेको बताइएको छ ।

राउतलाई खोजी गर्नका लागि प्रहरीले विभिन्न होटेल तथा लजमा सर्च अभियान जारी राखेको बताइएको छ । बुधवार संविधानको विरोधमा ‘कालो दिवस’ मनाउन तथा शहीदलाई सम्मान स्वरूप श्रद्धान्जलि दिनका लागि विरोधसभा राउत सहभागी हुने बताइएको छ । 

त्यसका लागि राउतका कार्यकर्ताले गाउँगाउँबाट मानिस ल्याएर जनकपुर भर्ने तयारी गरेको छ । राउत विगत केही सातादेखि सम्पर्कविहीन भएका छन् । ‘चलु जनकपुर भरु जनकपुर’ नारा दिएर जनकपुरमा बुधवार राउतले शक्ति प्रदर्शन गर्ने तयारी गरेको बुझिएको छ ।

राउतलाई पक्राउ गर्नका लागि प्रहरी टोली खटिएको भएपनि हालसम्म पक्राउ पर्न सकेका छैनन् ।