काठमाडौं – नेपाल इन्भेस्टमेन्ट बैंक लिमिटेडले काठमाडौंको बुढानिलकण्ठ नगरपालिका–१३ स्थित चुनिखेलमा आफ्नो आठौं एक्स्टेन्सन काउन्टर खोलेको छ ।

बैंकका नायव महाप्रबन्धक विजेन्द्र सुवाल र वडा अध्यक्ष श्रीकृष्ण श्रेष्ठले काउन्टरको संयुक्त रुपमा उद्घाटन गरे ।

काठमाडौंको पूर्वी भूभागमा पर्ने बुढानिलकण्ठस्थित १३ नम्बर वडा कार्यलयमा खोलिएको काउन्टरले चुनिखेल क्षेत्रको वडा सम्बन्धी सम्पूर्ण आर्थिक कारोबार गर्न सहयोग गर्ने छ । काउन्टरले ७ हजारको संख्यामा रहेका स्थानीय जनतालाई वित्तीय साक्षरता प्रदान गरी बैंकिङ कारोबारका लागि प्रोत्साहन गर्नेछ ।

सर्लाहीको बरहथवास्थित गुदारी बजारमा रहेको नेपाल इन्भेस्टमेन्ट बैंक लिमिटेडको शाखालाई स्थानीय माग अनुसार ईलाका प्रहरी कार्यालय अगाडि स्थानान्तरण गरिएको छ । ८० हजारको हाराहारीमा रहेका स्थानीयलाई छिटो, छरितो र उत्कृष्ट वित्तीय सेवा दिन बैंक प्रयासरत रहने छ ।

सर्वसाधारणलाई सहज बैंकिङ सेवा प्रदान गर्ने उद्देश्यले वित्तीय सञ्जाल नपुगेका क्षेत्रमा शाखा विस्तार गर्ने योजना अनुसार बैंकले सेवा विस्तारको अभियानलाई निरन्तरता दिइरहेको हो ।

८ लाख ७० हजारभन्दा बढी उपभोक्ता रहेको नेपाल इन्भेस्टमेन्ट बैंक लिमिटेडको हाल ७७ वटा शाखा तथा १ सय २ वटा एटीएम छ । ५ लाख ५० हजारभन्दा बढी भिसा डेबिट कार्ड प्रयोगकर्ता रहेको बैंकको ६० वटा शाखारहित बैंकिङ सुविधा तथा ९ वटा राजस्व संकलन केन्द्रका साथै बैंकको सञ्जालमा ७ सय ९० बढी भिसा तथा एनपीएन सदस्य बैंकका एटीएम रहेको छ ।

भर्खरै यूरोमनि अवार्ड– ‘उत्कृष्ट बैंक नेपाल– २०१८’ जितेको बैंकले ५ पटकसम्म  ‘बैंक अफ द इयर’ अवार्ड प्राप्त गरिसकेकोे छ ।