विराटनगर – साढे ३३ किलो सहितको ३८ क्विन्टल सुन तस्करी प्रकरण र मोरङ उर्लावारीका सनम शाक्यको हत्या प्रकरणमा जिल्ला अदालतको आदेशअनुसार थुनामा रहेका प्रहरीका निलम्बित एसपी विकासराज खनाल तारेखमा रिहा भएका छन् ।

उच्च अदालत विराटनगरले निलम्बित एसपी खनाललाई तारेखमा रिहा गर्न आदेश दिएको हो ।

उच्च अदालत विराटनगरका न्यायाधीश नागेन्द्रलाभ कर्ण र थीरबहादुर कार्कीको संयुक्त इजलाशले खनाललाई तारेखमा रिहा गर्न आदेश दिएको हो ।

त्रिभुवन अन्तर्राष्ट्रिय विमानस्थलमा कार्यरत रहेको अवस्थामा सुन तस्करीमा संलग्न रहेको पाइको भन्दै जिल्ला अदालत मोरङले उनलाई पुर्पक्षका लागि थुनामा राख्न आदेश दिएको थियो । 

जिल्ला अदालतको आदेशअनुसार थुनामा रहेका खनाल तत्कालीन मुलुकी ऐनअन्तर्गत अदालती बन्दोबस्तीको १७ नम्बर महलअन्तर्गत उच्च अदालत विरटानगर गएका थिए । 

उच्च अदालत विराटनगरले तत्काल प्राप्प प्रमाणबाट खनाललाई थुनामा राखिराख्नुपर्ने कारण नदेखिएकाले तारेखमा राखि मुद्दाकाे पुर्पक्ष गर्न अादेश दिएको हो । 

मंगलवार खनालको पक्षमा वरिष्ठ अधिवक्ता यदुनाथ खनाल र अधिवक्ता विकास थापाले बहस गरेका थिए । यस्तै वादी (सरकार)को पक्षबाट जिलला सरकारी वकिल कार्यालय मोरङका जिल्ला न्यायाधीवक्ता पुन्य प्रसाद पाठक र उप–न्यायाधीवक्ता राजेन्द्र सिंह भण्डारीले प्रतिरक्षार्थ बहस गरेका थिए । 

साढे ३३ किलो सुन तस्करी र सनम शाक्य हत्या प्रकरणमा जिल्ला अदालतको आदेशअनुसार थुनामा रहेर उच्च अदालतले रिहा गरेका निलम्बित प्रहरी अधिकारीमा खनाल तेस्रो हुन् । उच्च अदालत विराटनगरले यसअघि गत शुक्रवार प्रहरीका निलम्बित वरिष्ठ उपरीक्षक (एसएसपी) दिवेश लोहनी तथा आइतवार निलम्बित प्रहरी नायव उपरीक्षक (डिएसपी) प्रजित केसीलाई साधारण तारेखमा रिहा गर्न आदेश दिएको थियो ।