काठमाडौं – विषाक्त मदिरा सेवनबाट मलेसियामा चार नेपालीसहित सात जनाको मृत्यु भएको छ ।

मृत्यु हुनेमा नेपालीका अलावा एक मलेसियन, एक भारतीय र एक बंगलादेशी रहेको खबर मलेसियन अनलाइन द स्टारले लेखेको छ ।

मृतकहरूको पहिचान खुलेको छैन ।

अन्य १६ जना बिरामी परेका छन् । त्यसमध्ये १३ जना नेपाली छन् । उनीहरूको विभिन्न अस्पतालमा उपचार भइरहेको छ ।

प्रहरीले घटनाबारे अनुसन्धान थालेको छ । पोस्टमार्टम रिपोर्ट आएपछि यसबारे थप खुल्ने प्रहरीले जनाएको खबरमा उल्लेख छ ।

परराष्ट्र मन्त्रालयका प्रवक्ता भरतराज पौडेलले घटनाको सम्बन्धमा हल्ला सुनेको र मलेसिया स्थित दूतावासलाई बुझ्न निर्देशन दिइएको लोकान्तरलाई बताए ।

दूताबासबाट खवर आएपछि मात्र थप जानकारी दिन सकिने उनले बताए ।