प्रचण्डको सम्बोधनको चिनियाँ उपराष्ट्रपतिले गरे प्रशंसा, आजै स्वदेश फर्किने

अन्तर्राष्ट्रिय शान्ति स्मृति दिवसलाई सम्बोधन गर्दै प्रचण्ड
असोज ३, २०७५

काठमाडौं – छिमेकी राष्ट्र चीनको भ्रमणमा रहेका नेपाल कम्युनिष्ट पार्टी (नेकपा)का अध्यक्ष एवं पूर्व प्रधानमन्त्री प्रचण्डले बुधवार चीनका उपराष्ट्रपति वाङ क्वी सानसँग भेटवार्ता गरेका छन् ।

भेटका अवसरमा अध्यक्ष प्रचण्डले नेपालमा द्वन्द्वको अन्त्य गरेर शान्ति स्थापना गरेको बताउँदै अब आफूहरूको अभिभारा देशको समृद्धि भएको बताए । त्यसको आधारका रूपमा कम्युनिष्ट पार्टीको बलियो सरकार बनाई राजनीतिक स्थिरता निर्माण गरेको उनको भनाइ थियो ।


ADVERTISEMENT

'हामीसँग थुप्रै अवसर र चुनौतीहरू छन्, चुनौतीको सामना गरेर मात्र विद्यमान अवसरहरू प्राप्त गर्न सकिन्छ,' प्रचण्डको भनाइ उद्धृत गर्दै उनको सचिवालयले जानकारी दियो ।

प्रचण्डले नेपाल कम्युनिष्ट पार्टी र चिनियाँ कम्युनिष्ट पार्टीबीचको सम्बन्धलाई अझै सुदृढ गर्ने तथा नेपाल सरकार र चीनियाँ सरकारबीच भएका सम्झौता र समझदारीलाई कार्यान्वयन गराउने आफ्नो भ्रमणको उद्देश्य भएको बताए ।

भेटमा उपराष्ट्रपति सानले प्रचण्डलाई चीनमा स्वागत गर्न पाउँदा खुशी लागेको बताए ।

'तपाईलाई चीनमा स्वागत गर्न पाउँदा अत्यन्त खुसी लागेको छ । तपाई हाम्रो पुरानो कमरेड हुनुहुन्छ । तपाईसँग भेट गर्न पाउँदा हामीलाई खुसी लाग्छ । तपाई हाम्रो पहिले पनि भेट भएको थियो,' उनले भने ।

साथै उनले प्रचण्डले गरेको सम्बोधन निकै प्रभावशाली भएको भन्दै प्रशंसा पनि गरेको प्रचण्डको सचिवालयले जनाएको छ ।

प्रचण्डले चीनको च्याङ्सु प्रान्तको नान्चिङमा आयोजित अन्तर्राष्ट्रिय शान्ति स्मृति दिवसलाई बुधवार सम्बोधन गरेका थिए ।

उक्त समारोहमा विभिन्न देशका राष्ट्रपति, उपराष्ट्रपति, पूर्व प्रधानमन्त्री लगायतको उपस्थिति थियो ।

प्रचण्ड आजै राति सवा १० बजे राजधानी फर्किँदैछन् ।

असोज ३, २०७५ मा प्रकाशित

प्रतिक्रिया दिनुहोस

ताजा समाचार