संविधान दिवसको विरोधमा सीके राउतले देखाए ‘तागत’, पक्राउ गर्न आएको प्रहरी जिल्ल !

असोज ३, २०७५

जनकपुरधाम–  संविधान जारी भएको तेस्रो वर्ष, बुधवार देशभर धुमधामका साथ ‘संविधान दिवस’ मनाइए पनि प्रदेश नम्बर २ मा भने केही ठाउँमा त्यसको विरोध समेत भएको छ । खासगरेर ‘स्वतन्त्र मधेस’ अभियान चलाइरहेका सीके राउतको समूहले संविधानको विरोध गर्दै २ नम्बर प्रदेशको राजधानी जनकपुरधाममा ‘श्रद्धाञ्जली सभा’ आयोजना गर्यो । 

संघीय सरकारले संविधान दिवसको तयारी गरिरहेका बेला राउतले भने विरोध दिवस मनाउन तयारी गरिरहेका थिए । सोही सूचनाका आधारमा उनलाई पक्राउ गर्न भनेर व्यापक मात्रामा प्रहरी समेत परिचालन गरिएको थियो । राउतको कार्यक्रमलाई असफल पार्न बुधवार बिहानैदेखि व्यापक मात्रामा नेपाल प्रहरी र सशस्त्र प्रहरी परिचालन गरिएको थियो । राउतको कार्यक्रम रोक्न २ नम्बर प्रदेशका अन्य जिल्लाबाट पनि थप सुरक्षाकर्मी जनकपुरमा झिकाइएको थियो । 


ADVERTISEMENT

तर, राउत भने कार्यक्रम आयोजना गर्न सफल भए । प्रहरीको अबरोधका बाबजुद राउतले आफ्ना समर्थक र कार्यकर्ताका बीच जनकपुरको मुख्य चोक भनिएको रामानन्द चोकमा सभा गरेका थिए । राउत समूहको सभा चलिरहँदा राजमार्गको सडक करीब १ घण्टा जति अवरुद्ध पारिएको थियो । 

राउतलाई नै पक्राउ गर्न परिचालन भएको प्रहरीले बुधवार दिनभरी जनकपुरलगायत २ नम्बर प्रदेशका विभिन्न ठाउँबाट उनका १०८ जना समर्थकलाई पक्राउ गरेको छ । 

राउतले सम्बोधन गर्ने भनिएको स्थान रंगभूमि मैदान बाह्रबिघालाई सुरक्षाकर्मीले बिहानै देखि आफ्नो नियन्त्रणमा लिएका थिए । उक्त मैदान क्षेत्रमा सयौंको संख्यामा सुरक्षाकर्मी परिचालन गरिएको थियो ।  रंगभूमि मैदानको सबै प्रवेशद्वार बन्द गरिएको थियो । त्यहाँ भेला हुन खोजिरहेका राउतका केही कार्यकर्ताहरूलाई प्रहरीले गिरफ्तार समेत गर्यो ।

पहिलेदेखि नै रामानन्द चोकमा भेला हुने भनिएकाले त्यहाँ पनि सुरक्षाकर्मीको बाक्लै उपस्थिति थियो । १ बजे तिर राउतका समर्थकहरूले रामानन्द चोकमा ‘शहीद’हरूको तस्वीरसहितको व्यानर झुण्डयाएर श्रद्धाञ्जली कायक्रम आयोजन गर्न थाले । राउतको एजेण्डा रहेको माग सहितको नाराबाजी गर्दै उनीहरूले प्रदर्शन गर्न थालेपछि प्रहरीले हस्तक्षेप गर्दै पक्राउ गरेर जिल्ला प्रहरी कार्यालय धनुषा पुर्याए । 

प्रहरीले पक्राउ गर्ने क्रम र त्यहाँ थप कार्यकर्ता जम्मा हुने चलन चलिरह्यो । प्रहरीले ४ पटक गरेर रामानन्द चोकबाट राउतका कार्यकर्तालाई गिरफ्तार गरेको थियो । दिउँसो २ बजेतिर राजमार्गको पिराडी चोकबाट रामानन्द चोकमा सयौं कार्यकर्ताहरू मोटरसाइकलमा प्रदर्शन गर्दै आए, त्यहाँ खटिएका सुरक्षाकर्मी पछि हट्न बाध्य भए । त्यस पछि त्यो जुलुश रामनद चोक देखि अस्पताल रोड हुंदै जानकी मन्दिर, जनक चोक, राम चोक, मुरली चोक, बिश्वकर्मा चोक, भ्रमरपुरा चोक हुंदै रामानद चोक मा फिर्ता आउँदा करीब २ हजार जतिको संख्याको भीड जुलुसमा सहभागी भएको थियो । 

रामानन्द चोकमा सभा आयोजन गर्न करीब आधा घण्टा जति भीड जम्मा भए पछि अचानक राउत त्यहाँ आइपुगे । राउतलाई पक्रउ गर्न भनेर २ साता अगाडिदेखि प्रहरी परिचालन भएको थियो । 

तर प्रहरीलाई नै झुक्याउँदै राउत एकाएक रामानन्द चोकमा देखा परे । प्रहरीले राउतलाई गिरफ्तार गर्न सकेन । 

राउतले सम्बोधनका क्रममा मधेस केन्द्रित प्रमुख दुई दल संघीय फोरम र राजपाको आलोचना गरे । साथै संघीय सरकारको पनि आलोचना गरे । राउतले आफ्नो सम्बोधनका क्रममा प्रहरी हिरासतमा मृत्यु भएका राममनोहर यादवदेखि स्थानीय तहले बढाएको करको प्रसंग उठाए । 

राउतले बुधवार ‘चलु जनकपुर, भरु जनकपुर’ नारा दिएर सिरहा, महोत्तरी र धनुषाबाट आफ्ना कार्यकर्तालाई भेला हुन आह्वान गरेका थिए । सार्वजनिक सवारीका मजदुर र चालकहरुको हड्तालका कारण अपेक्षा गरिएअनुसार राउतका कार्यकर्ता उपस्थित हुन नसकेको कतिपयको भनाइ थियो । 

राउतभन्दा ‘कमजोर’ राजपा ! 

प्रदेश नम्बर २ को सत्तारुढ तथा संघीय सरकारको समर्थक दल राष्ट्रिय जनता पार्टी (राजपा)ले पनि बुधवार संविधान दिवसको विरुद्धमा र्याली आयोजना गरेको थियो । तर, राजपाको र्यालीमा भने सीके राउतकोभन्दा निकै कमजोर देखियो । 

राउतको र्याली र सभामा २ हजारको हाराहारीमा समर्थकहरु उपस्थित हुँदा राजपाको र्यालीमा भने मुश्किलले २ सय जना देखिएका थिए । 

राजपाका नेता तथा २ नम्बर प्रदेशका सामाजिक बिकास मन्त्री नबल किशोर साहले जुलुसको अगुवाइ गरेका थिए । 
 

असोज ३, २०७५ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस