काठमाडौं–मेलम्ची खानेपानी आयोजनाको लागि ल्याइएको ३ सय ४० बोरा सिमेन्ट कर्मचारीले बेचेको पाइएको छ ।

यसबारे मन्त्रालयमा उजुरी परेपछि खुलासा भएको हो । आयोजनाको अम्बाथान हेलम्बु सुरुङको बाँध निर्माणको लागि ल्याएको ३ सय ४० बोरा सिमेन्ट मिलेमतो गरी निजी पसलमा बिक्री भएको खानेपानीमन्त्री बीना मगरका स्वकीय सचिव विजयदेव भट्टराईले शनिबार जारी गरेको विज्ञप्तिमा उल्लेख छ ।

उनले भनेका छन्, ‘आयोजनाको काम समयमा सक्नुपर्ने जिम्मेवारीलाई आत्मसात गरी निर्माण कार्य अघि बढाउन मन्त्रालय र सम्बन्धित निकाय दिनरात लागि परेको सन्दर्भमा यस किसिमको घटना हुनु दुःखद कुरा हो ।’

घटनामा संलग्न दोषीहरुलाई कानुन बमोजिम कारवाही गर्न र अब उप्रान्त यस्तो घटना दोहोरिन नदिन मन्त्रालयले सम्बन्धित जिम्मेवार निकायलाई निर्देशन दिएको पनि विज्ञप्तिमा उल्लेख गरिएको छ । हो । यसबारे खानेपानी मन्त्रालयले गम्भीर ध्यानाकर्षण भएको जनाउँदै दोषीमाथि कारबाही गरिने जनाएको छ ।

राष्ट्रिय गौरवको आयोजना निर्माण कार्यको सम्बन्धमा देखिएको यस किसिमको लापरवाही प्रति मेलम्ची खानेपानी विकास समिति र सम्बन्धित ठेकेदार कम्पनी सिएमसी थप जिम्मेवार भई कार्य गर्न मन्त्रालयको तर्फबाट सचेत पनि मन्त्रालयले गराएको छ ।