काठमाडौं – नेकपाका सांसद रामनारायण बिडारीले संविधानलाई जलाउने, ढुंगाले हान्नेविरुद्ध जनता अरिङ्गाल भएर जाइलाग्ने बताएका छन् ।

राष्ट्रियसभाको आइतवारको बैठकमा बोल्दै सांसद बिडारीले संविधानमाथिको हमला स्वीकार्य नहुने बताए ।

'संविधानलाई ढुंगाले हान्ने, आगो लगाउने, झुठा कुरा गर्ने र जनताको मनभित्र छिर्ने काम भयो भने अरिङ्गाल भएर आउँछन्,' सांसद बिडारीले भने– 'अरिङ्गाल त्यस्तो चिज हो उसलाई ढुंगाले हान्यो भने एकैचोटि हमला गर्छ ।'

उनले भेडाको प्रसंग पनि ल्याए । 'अर्को एउटा पशु पनि छ, भेडो । भेडाको खुट्टा च्वाट्ट काट्दिनुस्, कराउँदैन । उफ्रिन्छ, छटपटिन्छ तर कराउँदैन । अगाडि एउटा लौरो तेर्स्यायो भने भेडो बुर्लुक्क उफ्रिएर लौरो नाघेर जान्छ । अनि लौरो थुतिदियो भने त्यो भन्दा पछाडिको भेडो पनि त्यसैगरी उफ्रिएर जान्छ, तर त्यहाँ लौरो हुँदैन,' बिडारीले भने – 'हामी त्यस्तो (भेडाजस्तो) पार्टी बनाउन चाहँदैनौं । हामी अरिङ्गाल जस्तो, मौरी जस्तो पार्टी बनाउन चाहन्छौं । आइलाग्नेलाई जाइलाग्ने नीति निर्माणका कुरा हामीले गर्ने हो ।'

साथै उनले न्यायपालिकालाई स्वतन्त्र र स्वच्छ पार्न सत्तापक्ष र प्रतिपक्ष दुवैको दायित्व भएको पनि बताए ।