काठमाडौं– नेपाली महावाणिज्यदूतावास कोलकताले नेपालको राष्ट्रिय दिवस(संविधान दिवस)को उपलक्षमा कार्यक्रमको आयोजना गरेको छ ।

पश्चिम बंगाल सरकारका अतिरिक्त मुख्य सचिव देवाशिष सेनको प्रमुख आतिथ्यतामा सम्पन्न कार्यक्रम कोलकतास्थित कूटनैतिक नियोगका प्रमुख तथा प्रतिनिधिहरु, सरकारी उच्चपदस्थ अधिकारीहरु, प्रहरी अधिकारी, कोलकता पोर्ट टट, भन्सार कार्गे ह्यान्डलिङका प्रतिनिधिहरु, लगानीकर्ता, सञ्चारकर्मी नेपाली समुदायका प्रतिनिधिहरु एवं नेपाली तथा विदेशी डाक्टरहरुको सहभागीता रहेको थियो । 

कार्यक्रममा महावाणिज्यूत एकनारायण अर्यालले स्वागत मन्तव्य राख्दै सरकार संवृद्ध नेपाल खुशी नेपाली भन्ने नाराका साथ नेपालमा आर्थिक विकास बृद्धि गर्न कटिबद्ध रहेको र हालै सरकारले वैदेशिक लगानी, व्यापार एवं पर्यटन प्रवर्धनको नीति ल्याएको उल्लखे गरे ।

उनले नेपालमा लगानी गर्ने वातावरण भएकोले जलशक्ति, पर्यटन प्रविधि र व्यापार क्षेत्रमा लगानी गर्न सहभागीहरुलाई आग्रह गरे ।

कार्यक्रममा प्रमुख अतिथि देवशिष सेनले नेपालको राष्ट्रिय दिवसको उपलक्ष्यमा बधाइ दिँदै विविध सांस्कृतिक, भौतिक र प्राकृतिक मनारमताले भरीपूर्ण सुन्दर देश नेपाल पर्यटकीय गन्तव्य रहेको उल्लखे गरे ।