सुर्खेत – गत भदौ ३१ गते लोकान्तरमा ‘नगरपालिकाको चरम बेवास्ता, वाणिज्य संघले राखिदिएको ३१ मध्ये ९ वटा सीसीटीभी मात्र चालू’ शीर्षकमा समाचार प्रकाशित भयो ।

समाचार प्रकाशित भएको १० दिनमै नगरपालिकाले नगरमा रहेका सबै सीसीटीभी क्यामेरा सञ्चालनमा ल्याएको छ ।

जिल्ला प्रहरी कार्यालय सुर्खेतमा राखिएको कन्ट्रोल रुममा मंगलबारसम्म ३१ मध्ये २५ वटा सञ्चालनमा आएका छन् । अन्य ६ वटा क्यामेरा पनि १–२ दिनमै सञ्चालनमा आइसक्ने छन् ।

जिल्ला प्रहरी कार्यालय सुर्खेतका प्रहरी नायव उपरीक्षक श्यामसिंह चौधरीले २५ वटा क्यामेरा सञ्चालनमा आएको बताए । ‘यसअघि बजार क्षेत्रमा रहेका ९ वटा क्यामेरा मात्रै सञ्चालनमा आएका थिए भने अन्य सबै क्यामेरा खराब भएका थिए,’ उनले भने, ‘त्यसले सुरक्षा संयन्त्रलाई काम गर्न र अपराध नियन्त्रण गर्न प्रहरीलाई गाह्रो भएको थियो ।’

अब सीसीटीभी क्यामेरा सञ्चालनमा आइसकेपछि दशैंतिहार जस्ता पर्वमा बजार क्षेत्रमा हुने आपराधिक क्रियाकलाप रोक्न अत्यन्तै सहज हुने उनले बताए । ‘अब हामीलाई बजार क्षेत्रको निगरानी गर्न अत्यन्तै सहज भएको छ । नगरपालिकाको जिम्मेवारपूर्ण कदमले जनतालाई शान्ति सुरक्षा दिने हाम्रो अभियानलाई सार्थकता दिने मेरो विश्वास छ ।’

उनका अनुसार मंगलगढीचोक लगायतका ५ स्थानमा सडक विस्तार गर्दा निकालिएका सीसीटीभी क्यामेरा विस्तारमा तदारुकता आएको छ । ‘चारलेन सडक विस्तारका क्रममा ५ वटा क्यामेरा निकालिएको थियो,’ डीएसपी चौधरीले भने, ‘ती क्यामेरा जडान कार्य पनि तदारुकताका साथ भइरहेका छन् । अब १–२ दिन भित्रमा अन्य ६ वटा क्यामेरा पनि काम गर्न शुरू गर्ने छन् ।’ 

डीएसपी चौधरीले नगरको शान्ति सुरक्षा कायम गर्न प्रविधिमैत्री हुनुको विकल्प नभएको बताए । ‘पहिलेको जस्तो गस्ती गरेर मात्रै अपराध न्यूनीकरण गर्न गाह्रो छ,’ उनले भने, ‘अब जोसुकैले पनि प्रविधिलाई अगांल्नपर्ने बाध्यता आइसकेको छ । हामी पनि प्रविधिमैत्री बन्न जरुरी छ ।’

नगरको निगरानीका लागि कम्तिमा पनि १ सय ९० भन्दा बढी क्यामेरा आवश्यक पर्ने उनको अनुमान छ । ‘नगरपालिकाभर बजार क्षेत्र, नगरपालिका भित्रने नाका तथा मुख्य चोकमा मात्रै भएपनि क्यामेरा जडान गर्न सकेको खण्डमा अपराध न्यूनीकरण गर्न हामीलाई अत्यन्तै सहज हुन्छ,’ वीरेन्द्रचोकमा लगाइएको क्यामेरालाई चारैतिर घुमाएर देखाउँदै डीएसपी चौधरीले भने, ‘ल हेर्नुस्, गाडीको नम्बरदेखि चालकको फोटोसमेत यसरी हेर्न, देख्न र आवश्यकता परेका बेला पत्ता लगाउन पाइन्छ ।’

वीरेन्द्रनगर नगरपालिकाका नगर प्रमुख देवकुमार सुवेदीले नगरलाई घच्घच्याएकोमा लोकान्तरलाई धन्यवाद दिए । ‘हामीलाई बेला–बेला रचनात्मक खबरदारी गर्दै आउनुभएको छ,’ उनले भने, ‘यहाँहरूलाई धन्यवाद दिँदै आगामी दिनमा पनि नगरको तर्फबाट केही गलत भएको भए यसरी नै रचनात्मक सहयोग गर्न आग्रह गर्दछु ।’

प्रमुख सुवेदीले नगरपालिका प्रदेश सरकार र बैंकसँग तथा अन्य सरोकारवाला निकायसँग सहकार्य गर्दै सुरक्षित वीरेन्द्रनगर बनाउने तयारीमा लागेको बताए ।

‘नगरको सुरक्षा गर्ने जिम्मेवारी नगरका जनप्रतिनिधिको मात्रै नभएर सबैको हो,’ नगर प्रमुख सुवेदीले भने, ‘त्यसका लागि आवश्यक स्थानमा थप केही थान सीसीटीभी क्यामेरा जडान गर्नेछौं र नगरलाई शान्त बनाउन सबैको सकारात्मक भूमिकाको अपेक्षा गरेको छु ।’