विराटनगर – पारिश्रमिक नपाएको भन्दै विराटनगरका सरसफाई मजदुर आन्दोलित हुँदा दुर्गन्ध बढेको छ ।

चाडपर्व दशैंतिहारको मुखमा आएर पारिश्रमिक तथा दशैं बोनस नदिएको भन्दै विराटनगरका सरसफाई मजदूर आन्दोलनमा उत्रिएका हुन् । विराटनगर महानगरपालिकाको सरसफाईको ठेकेदार कम्पनी वेस्ट म्यानेजमेन्ट ग्रुप नेपालले महानगरभित्र रहेका सरसफाई कर्मचारी काम छाडेर आन्दोलनमा उत्रिएका हुन् ।

हालसम्मको पारिश्रमिक र दशैं बोनस उपलब्ध गराउनुपर्ने माग गर्दै वेस्ट म्यानेजमेन्टको कार्यालय घेराउ गरेका हुन् । आन्दोलनका कारण विराटनगर महानगरपालिकाभित्र ३ दिनदेखि फोहोर संकलन रोकिएको छ । फोहोर व्यवस्थापन नहुँदा बजार क्षेत्र दुर्गन्धित बन्दै गएको छ ।

हरेक वर्ष दशैं अगावै तलब र दशैं बोनस दिने गरेको भएपनि यस पटक नदिएपछि आन्दोलित हुनुपरेको मजदूरको भनाई छ  । सरसफाई कर्मचारी अनितादेवी मरिकले नियमित पाउँदै आएको सेवासुविधा नदिएको बताइन् ।

विराटनगर महानगरपालिकाले वेस्ट म्यानेजमेन्ट कम्पनीसँग ५ वर्षको लागि फोहोर उठाउने जिम्मा दिएको थियो । विराटनगर महानगरपालिकामा अहिले दैनिक १ सय १० टन फोहोर संकलन हुने गरेको छ । महानगरपालिका र वेस्ट म्यानेजमेन्ट प्रालिबाट खटाइएका करीब २ सय सरसफाई कर्मचारीलाई दशैंको बोनस र तलब वृद्धिको समेत माग गरिएको सरसफाई कर्मचारी राजु मरिकले बताए ।

पूर्णकालीन सरसफाई कर्मचारीलाई १५ हजार रुपैयाँ र आंशिक कर्मचारीलाई मासिक ८ हजार दिँदै आएकोमा तलबको ५० प्रतिशत माग गरिएको उनको भनाई छ । फोहोरमैला उठाउने जिम्मा पाएको वेस्ट म्यानेजमेन्ट ग्रुप प्राइभेट कम्पनी भएको कारण दशैं बोनस र तलब वृद्धि गर्न नसकिने कम्पनीका परियोजना प्रमुख देवीप्रसाद आचार्यले बताए ।

मासिक ज्याला समयमा नै दिने गरेको भएपनि कम्पनीको स्रोत कमजोर भएको कारण पैसा नभएर घाटामा गएकाले बोनस दिन नसकिने आचार्यले तर्क गरे । दशैंको मुखमा सरसफाई कर्मचारी आन्दोलित भएपछि विराटनगरको फोहोरमैला व्यवस्थापनबारे महानगरपालिकासँग छलफल गरिने आचार्यको भनाई छ ।

कम्पनीले केही कामदारलाई मौखिक आश्वासन दिएका कारण काममा फर्केका छन् भने केही कामदार अझैं विरोधमा छन् । यसरी दशैंको मुखमा आएर आन्दोलनमा होमिएका कामदारलाई काममा नफर्काउने हो भने समस्या देखिने नगरवासीको भनाई छ ।