काठमाडौं — लियोनेल मेस्सीमा नेतृत्व क्षमता नभएको डीएगो म्याराडोनाले बताएका छन् । म्याराडोनाका अनुसार, मेस्सी खेल शुरू हुनुअघि २० चोटि ट्वाइलेट जान्छन् । 

एकतीस वर्षको उमेरमा फूटबलका एलिट खेलाडीका रूपमा पाँचचोटि बलोन दोर जितिसकेका मेस्सीले चरम दबाब र अपेक्षा खप्ने बानी विकसित गरिसकेका छन् । 

तर उनी कप्तानीको भार सहन चाहिँ संघर्ष गरिरहेका हुन्छन् । हालैका दिनमा उनी बार्सिलोना क्लबका कप्तान बनेका छन् भने केही समयदेखि अर्जेन्टिनाको कप्तानी गरेका हुन् । 

अर्जेन्टिनाको कप्तान हुनका लागि मेस्सी गलत पात्र भएको म्याराडोनाको विश्वास छ । उनी टोलीका सर्वोत्कृष्ट खेलाडी चाहिँ पक्कै हुन् तर आफूवरिपरिकालाई प्रेरित गर्ने व्यक्तिगत क्षमता चाहिँ उनीसँग छैन भन्छन् म्याराडोना ।

अर्जेन्टिनालाई सन् १९८६ को विश्वकप जिताएका म्याराडोनाले रुस विश्वकपमा अर्जेन्टिनाको संघर्ष प्रत्यक्ष देखेका थिए । उनले ला अल्टिमा पालाब्रा मेक्सिकोलाई भने, ‘मेस्सी महान् खेलाडी हुन् र तर नेता हैनन् ।’

‘प्रशिक्षक र खेलाडहिरूसँग कुरा गर्नुअघि उनी प्लेस्टेसन खेल्छन् । अनि मैदानमा चाहिँ नेता बन्न चाहन्छन् । तर खेलअघि २० चोटि बाथरूम जाने मानिसलाई नेता बनाउन खोज्नु बेकारको कुरा हो । मेस्सीलाई भगवान् बनाउन छाडौं ।
उनी अर्जेन्टिनाका एक खेलाडी मात्र हुन् ।’

रुस विश्वकपको अन्तिम १६ बाट बाहिरिएपछि मेस्सीले अर्जेन्टिनका लागि कुनै खेल खेलेका छैनन् । 

उनले अर्जेन्टिनाका लागि हालका लागि नखेल्ने संकेत दिएपछि अन्तरिम प्रशिक्षक लियोनेल स्कालोनीले वैकल्पिक खेलाडीहरू खोज्नुपरेको छ । 

म्याराडोनाले चाहिँ मेस्सीलाई टीममा फर्काउनुपर्ने तर कप्तानी दिन नहुने धारणा राखेका छन् ।

गोल डट्कमबाट