काठमाडौं। चलचित्र ‘प्रसाद’को दोस्रो गीत सार्वजनिक गरिएको छ । ʻलै लैʼबोलको गीतको सकारात्मक प्रतिक्रियासंगै निर्माण यूनिटले आइतबार राजधानीमा एक कार्यक्रमको आयोजना गरि ‘बनकी चरी’ बोलको गीत सार्वजनिक गरेको हो । 

यो गीतमा रुपक डोटेल र अन्जु पन्तको स्वर रहेको छ । वी पाण्डेको शब्दमा सुभाष भुषालले संगीत भरेका छन् । गीतको भिडियोमा अभिनेता विपिन कार्की, निश्चल बस्नेत र मोडेल अञ्जली अधिकारीलाई फिचरिङ गरिएको छ । विपिन गायकको भूमिकामा देखिएका छन् ।

मंसिर २१ गतेबाट प्रदर्शनमा आउने चलचित्रले निःसन्तान दम्पत्तीको कथालाई उठान गरेको छ । चलचित्रमा नायिका नम्रता श्रेष्ठ पनि मुख्य भूमिकामा छिन् । दिनेश राउत निर्देशित चलचित्रको निर्मातामा सुवास थापा रहेका छन् ।

सुवास थापा इन्टरटेनमेन्टको ब्यानरमा बनेको ‘प्रसाद’मा राजेश श्रेष्ठले छायाँकन, लोकेश बज्रचार्यको सम्पादन, शिव विकको कोरिगोग्राफी छ । चलचित्रको कथा पत्रकार सुशील पौडेलले लेखेका हुन् ।