काठमाडौं – नेपाल राष्ट्र बैंकबाट १ नम्बरको विप्रेषण इजाजत प्राप्त नेपालको पहिलो र विश्वासिलो रेमिट्यान्स कम्पनीको रुपमा परिचित इजीलिंक रेमिट्यान्सले चर्चित पत्रकार रवि लामिछानेलाई कम्पनीको ब्रान्ड एम्बास्डरमा आधिकारिक रुपमा नियुक्त गरेको घोषणा गरेको छ ।

इजीलिंक रेमिट्यान्स ‘रेमिट्यान्सको रकम उत्पादनशील क्षेत्रमा लगानी गरौं’ भन्ने मूल नाराका साथ विगत १९ वर्षदेखि जापान, कोरिया, साइप्रस, अमेरिका लगायत विश्वका विभिन्न देशबाट नेपालमा रेमिट्यान्स भित्र्याउँदै आएको सेवा प्रदायक कम्पनी हो ।

लामिछानेले आफ्नो पेशालाई देशको राजनीतिक, सामाजिक, आर्थिक लगायत विविध क्षेत्रमा व्याप्त विकृति र विसंगतिविरुद्ध सशक्त रुपमा प्रयोग गरेका छन् । ‘नेपाली समाजमा सकारात्मक परिवर्तन ल्याउन देखाएको पेशागत इमान्दारिता र निष्ठाको कदर गर्दै आफ्नो ब्राण्ड एम्बास्डर घोषणा गरेका हौं,’ इजीलिंक रेमिट्यान्सका प्रमुख कार्यकारी अधिकृत डिपी अर्यालले भने । 

इजीलिंक रेमिट्यान्सले रेमिट्यान्सको रकमलाई उत्पादनशील क्षेत्रमा लगानी गर्न प्रोत्साहन मात्र नगरी विभिन्न रोजगार सम्बन्धी निःशुल्क रोजगारमूलक सेमिनारमा पनि योगदान गर्दै आएको छ ।

जापान र कोरियाबाट इजीलिंकमार्फत् पठाइएको रकमबाट पठाउने व्यक्तिको नाममा १ सय रुपैयाँ कर्णालीको कालिकोटमा बन्दै गरेको अस्पतालको खातामा जम्मा गरिने कुरा पनि पत्रकार सम्मेलनबीच प्रमुख कार्यकारी अधिकृत अर्यालले जानकारी गराए ।