त्रिपुराकोट – डोल्पाको त्रिपुराकोटमा दशैंको टीका जमरा आफ्नै साइतमा लगाउने गरिन्छ । 

नेपालभर ज्योतिषको साइतअनुसार टीका जमरा लगाउने गरेपनि डोल्पाको त्रिपुराकोटमा भने परापूर्वकालदेखि नै आफ्नै साइतअनुसार दशैंको टीका लगाउने प्रचलन छ । 

नेपालमै प्रसिद्ध शक्तिपीठका रुपमा रहेको त्रिपुरासुन्दरी मन्दिरमा बेलुकाको नित्य पूजापाठपछि मात्रै सबैले घर घरमा टीका जमरा लगाउन शुरू गर्ने पूजारी देवीकृष्ण उपाध्यायले बताए ।

‘नेपालभर टीकाको एउटै साइत भएपनि त्रिपुराकोटमा भने आफ्नै साइतमा लगाइन्छ, त्रिपुराकोटवासीले मन्दिरमा नित्य पूजाआजाका लागि दशमीको दिन बिहानै प्रत्येक घरबाट जमरा टीका चढाउन लैजाने गर्छन्,’ पूजारी उपाध्यायले भने । 

‘दशैंको औंशीको दिनदेखि दशमीको दिनसम्मको नवरात्र अवधिमा पूजाआजाका लागि आएका ब्राह्मण र पूजारीबीच एकअर्कामा जमरा टीका लगाएर बिदाइ गरेपछि मात्र सबैले आ–आफ्नो घरमा शुरू गर्ने प्रचलन अझै कायम छ ।’

ज्योतिषका अनुसार शुक्रवार बिहान ९ बजेर ५१ मिनेटमा देशैभर टीकाको उत्तम साइत भएपनि त्रिपुराकोटमा भने शुक्रवार रातिदेखि मात्र जमरा टीका लगाउन शुरू हुने गर्छ । 

नेपालभर ज्योतिषको साइतअनुसार जमरा टीका लगाउने प्रचलन भएपनि त्रिपुराकोटमा बेलुकी मात्रै टीका जमरा लगाउने प्रचलन नेपालमै नयाँ रहेको बताइएको छ ।