काठमाडौं – दशैंअघि पटक–पटक स्थगन हुँदै आएको नेपाल कम्युनिस्ट पार्टीको आइतवारको सचिवालय बैठकमा अहिले प्रधानमन्त्री निवास बालुवाटारमा शुरू भएको छ । 

गत असोज २२ को सचिवालय बैठकले असोज २४ गतेका लागि तोकेको बैठक पटक–पटक सरेकामा आइतवार र सोमबारका लागि तय गरिएको छ । बैठकमा प्रदेश कमिटीको पूर्णता, जिल्ला कमिटीको गठन, कात्तिक १२–१३ गते हुने स्थायी समिति बैठकको कार्यसूची तर्जुमा, पार्टी, संसद् तथा सरकारको समीक्षा, केन्द्रीय कार्यालयको व्यवस्थापनलगायत विषयमा छलफल हुने पार्टी कार्यालय सचिव कृष्णगोपाल श्रेष्ठले जानकारी दिए ।

गत जेठ ३ गते तत्कालीन नेकपा एमाले र नेकपा माओवादी केन्द्र बीचको एकता घोषणामा ३ महिनाभित्र तल्लो तहसम्म एकतालाई पूर्णता दिने जनाइएपनि ३ महिना पूरा भएको २ महिना व्यतीत भइसकेको छ । 

प्रदेशका इन्चार्ज, सहइन्चार्ज, अध्यक्ष र सचिवको चयनमा वरिष्ठ नेता माधवकुमार नेपालको सार्वजनिक रुपमा व्यक्त गरेको असन्तुष्टि, मन्त्रीहरुको कार्यप्रगति, नेता वामदेव गौतमलाई उपनिर्वाचनबाट संसद्मा ल्याउनेसम्बन्धी प्रस्तावलगायत विषयमा नेकपाभित्र विवाद पैदा हुँदै आएको छ ।

बैठकले ती विवादका विषयमा निक्र्योल गर्ने बताइएको छ ।