काठमाडौं — आफ्नो मालिक्नीको मृत्यु भएको एक व्यस्त सडकमा ८० दिनसम्म कुरेर बस्ने एक बफादार कुकुरले चीनको अन्लाइन समुदायको मुटु छोएको छ । 

भित्री मंगोलियामा रहेको होहोटको सडकको बीचमा बसेको कुकुरको फूटेज सिना वीबो माइक्रोब्लगमा १४ लाखपटक हेरिसकिएको छ । 

चीनको पीयर भिडियो वेबसाइटले उक्त कुकुर आफ्नी मालिक्नी अगस्ट २१ मा मरेदेखि प्रत्येक दिन सडकमा देखिएको लेख्यो । 

एक ट्याकसीचालकका अनुसार, मानिसहरूले उसलई मद्दत गर्न खोजेपनि कुकुर भागिहाल्छ । 

‘चालकहरूले सानो कुकुरलाई खानाका टुक्रा दिने गर्छन् । तर हामीहरू बाहिर निस्कनेबित्तिकै ऊ अन्त जान्छ,’ उनले भने । 

‘कुकुरको मालिक्नीसँग निकै घना सम्बन्ध थियो । उनी मरेपछि सानो कुकुर त्यही ठाउामा पहरा दिएर बस्यो । प्रत्येक दिन ऊ सडकमै हुन्छ । म जहिले पनि उसलाई देख्छु । मानिस र कुकुरबीचको सम्बन्ध कस्तो घनिष्ठ हुने है ?’

उक्त भिडियो नोभेम्बर १० मा खिचिएको थियो र यसलाई सिना वीबोमा शेयर गरिएपछि प्रयोगकर्ताहरूले कुकुरको बफादारिताका विषयमा टिप्पणी गरे । 

जापानमा सन् १९२० को दशकमा हाचिको नामक कुकुरले प्रत्येक दिन रेलवे स्टेसनमा आफ्नो मालिकलाई कुर्ने गरेको थियो । मालिक मरेको नौ वर्षसम्म पनि कुकुर रेलवे स्टेसन पुग्ने गरेको थियो ।

बीबीसीबाट