धनगढी –सुदूरपश्चिम प्रदेशको सामाजिक विकास मन्त्रीमा कृष्णराज सुवेदीले सपथ लिएका छन् ।

पदीय मर्यदाविपरीत गतिविधि गरेको भन्दै दीर्घबहादुर सोडारीलाई मन्त्री पदबाट बर्खास्त गरेकै दिन मंगलवार नयाँ मन्त्रीमा सुवेदी नियुक्त भएका छन् ।

मुख्यमन्त्री तथा मन्त्रिपरिषद्को कार्यालयका मुख्यमन्त्री त्रिलोचन भट्टले सुवेदीलाई प्रदेश प्रमुख मोहनराज मल्लको उपस्थितिमा पद तथा गोपनीयताको शपथ गराएका छन् । सपथ ग्रहणपछि सुवेदीले मंगलवारदेखि नै मन्त्रीको जिम्मेवारी सम्हालेका छन् ।

सुवेदी कैलाली निर्वाचन क्षेत्र नम्बर ४ (ख) बाट प्रदेशसभा सदस्यमा निर्वाचित भएका थिए । मन्त्रीबाट हटाइएका सोडारी भने कैलाली ४ (क) बाट निर्वाचित सांसद हुन् ।

गाडी दुर्घटना प्रकरणले खोसियो पद

मन्त्री सोडारीले प्रयोग गर्ने गाडी दुर्घटना सम्बन्धी प्रकरणले उनलाई हटाइएको स्रोतको दाबी छ । पार्टीको निर्देशनमा सोडारीलाई मन्त्रीबाट हटाइएको नेपाल कम्युनिस्ट पार्टी (नेकपा) स्रोतले जनाएको छ ।

मन्त्री सोडारीले प्रयोग गर्दै आएको बा२झ ३१२५ नम्बरको स्कारपियो जीप शुक्रबार राति कैलालीमा दुर्घटना भएको थियो । दुर्घटनामा ३ जना घाइते भएका थिए । 

पूर्वपश्चिम राजमार्गअन्तर्गत पर्ने कैलालीको बडैपुर सडक खण्डमा से३प २४२० नम्बरको मोटरसाइकल र मन्त्री सोडारीको स्कारपियो जीप एकआपसमा ठोक्किएर दुर्घटना भएको थियो ।