सुर्खेत – कर्णाली प्रदेशका आन्तरिक मामिला तथा कानूनमन्त्री नरेश भण्डारीले सरकारले ल्याउन लागेको पत्रकार स्वास्थ्य बीमामा सहभागी हुन कर्णालीका समस्त पत्रकारलाई आग्रह गरेका छन् ।

केही समयमा नै कार्यविधि टुंग्याइने जानकारी दिँदै उनले प्रदेश सरकार सधैं प्रेसमैत्री हुने बताए । ‘पत्रकारविरुद्ध हुने अपराधको दण्डहिनता सम्बन्धी अन्तर्राष्ट्रिय दिवसको अवसरमा बुधबार सुर्खेतमा आयोजित ‘सुरक्षित पत्रकारिताका लागि दण्डहिनताको अन्त्य’ विषयक कार्यक्रममा मन्त्री भण्डारीले भ्रष्टाचार गरिएका समाचार र विकासमैत्री खोजमूलक समाचार लेख्न पत्रकारलाई आग्रह गरे । 

‘हो हामीलाई थाहा छ । हजुरले भ्रष्टाचार, ढिलासुस्तीजस्ता कार्यविरुद्धको समाचार लेखेको खण्डमा तपाईलाई असुरक्षा हुनसक्छ । जुनसुकै बेला आक्रमण पनि हुन सक्छ,’ मन्त्री भण्डारीले भने, ‘तर पनि त्यस्ता कुनैपनि चुनौतीको पर्वाह नगरी निर्भिकतापूर्वक आफ्नो दायित्व पूरा गर्नुहोस् । तपाईको आवश्यक सुरक्षाका लागि सरकार तयार छ ।’

ज्यानको पर्वाह नगरी देश र जनताको पक्षमा, समाज रुपान्तरणको पक्षमा लाग्ने पत्रकारलाई जस्तोसुकै सुरक्षा दिन पनि सरकार तयार रहेको उनले बताए । ‘पत्रकारहरूको सकारात्मक परिवर्तनको अपेक्षाका कारण देशमा व्यवस्था बदलिएको छ,’ उनले भने, ‘युद्ध चलिरहेको बेला बम र गोलीको पर्वाह नगरी दायित्व पूरा गर्ने वीर पत्रकारप्रति गहिरो सम्मान छ ।’ कर्णाली प्रदेश सरकार पत्रकारमाथि हुने दण्डहिनता अन्त्यको लागि तयार रहेको उनले बताए ।

कार्यक्रममा नेपाल पत्रकार महासंघ कर्णाली प्रदेशका उपाध्यक्ष डम्मर आचार्यले खोजी रिपोर्टिङ गर्दा पत्रकारहरू जोखिममा रहेको भन्दै पत्रकारको सुरक्षाको लागि राज्यले ध्यान दिनुपर्ने बताइन् । नेपाल पत्रकार महासंघ सुर्खेत शाखाका अध्यक्ष गणेशकञ्चन भारतीले पत्रकारमाथि हुने दण्डहिनता अन्त्यको लागि कर्णाली सरकार पहल गर्नुपर्ने बताए ।

कार्यक्रममा प्रदेश प्रहरी कार्यालयका एसएसपी मोहन आचार्य, जिल्ला प्रहरी कार्यालय सुर्खेतका प्रहरी निरीक्षक शंकर श्रेष्ठ, वीरेन्द्रनगर नगरपालिकाका उपमेयर मोहनमाया ढकाल लगायतको सहभागिता थियो ।