काठमाडौं — उत्तर कोरियाका नेता किम जोङ–उन हालै विकसित एक अत्याधुनिक हतियारको अवलोकन गर्नका लागि परीक्षणस्थल पुगेका छन् । अमेरिका र दक्षिण कोरियासँग न्यानो सम्बन्ध बनाउँदै गरेका किमले हतियार विकास चाहिँ जारी राख्ने घोषणा यससँगै गरेका छन् । 

कोरियन सेन्ट्रल न्युज एजेन्सीले ठ्याक्कै कुन प्रकारको हतियार हो र परीक्षण कहिले गरिएको हो भनी स्पष्ट पारेन । तर उत्तरको आणविक कार्यक्रमका सम्बन्धमा अमेरिकासँग वार्ता स्थगित भएको अवस्थामा यो सार्वजनिक घोषणा आएको हो । 

वाशिङटनसँगको सम्बन्ध सुधार्ने क्रममा उत्तर कोरियाले आणविक र क्षेप्यास्त्र परीक्षण स्थगित गर्ने बताएको थियो अनि किमले उत्तरको ध्वस्त अर्थतन्त्र सुधार गर्नमा जोड दिने भनेका थिए । 

‘रणनीतिक हतियारको शक्ति देखेर सर्वोच्च नेता किम अत्यन्तै उत्साहित हुनुभयो । रक्षाक्षेत्रका वैज्ञानिकहरू र हतियार उद्योगका कामदारहरूले देशको सुरक्षा क्षमता बढाएर अर्को महान् काम गरेको उहाँले बताउनुभयो,’ रिपोर्टमा लेखिएको छ । 

किमलाई सैन्य नेताहरूले घेरेका थिए र उनीहरूले टिपोट गरेका थिए अनि त्यसको एउटा मात्र तस्वीर सार्वजनिक गरिएको हो । उत्तरले अन्तिम परीक्षण सन् २०१७ को नोभेम्बरमा गरेको थियो र त्यसपछि नाटकीय रूपमा कोरियाली प्रायद्वीपमा न्यानोपन आएको थियो । 

अमेरिकाको परराष्ट्र मन्त्रालयका एक प्रवक्ताले जुन महिनामा सिंगापुरमा डोनल्ड ट्रम्पसँगको सम्मेलनमा गरेको सहमतिलाई किमले पालन गर्ने विश्वास आफूले लिएको बताए ।

एजेन्सी