विराटनगर – विराटनगरमा रहेको आरोहण गुरूकूलको निर्माणको काम तीब्र भएको छ ।

भारतीय दूतावासको सहयोगमा विराटनगर महानगरपालिकाले आरोहण गुरुकूलको निर्माण तीब्र पारेको हो । करीब ३ सय ७० जना बस्ने क्षमताको नाटक घरको निर्माणको कामलाई समयमा नै सक्ने भनिएपनि निर्धारित म्याद गुज्रिएको छ ।

तर पछिल्लो समयमा आएर आरोहण गुरुकूलको कामलाई तीब्र पारिएको हो । महानगरपालिकाका इन्जिनियर गोपाल पोख्रेलले नाटक घरको काम पछिल्लो समय तीब्र पारिएको बताए ।

खुस्बु निर्माण सेवा विराटनगरले ३ करोड ५४ लाख ८० हजार रुपैयाँमा नाटक घर निर्माणको ठेक्का लिएपछि अहिले निर्माणको कामले तीब्रता पाएको छ । महानगरले नाटक घर निर्माणका लागि ३ करोड ५५ लाख ६१ हजार ९ सय ८८ रुपैयाँको स्टिमेट गरी टेन्डर आह्वान गर्दा ठेकेदारले ० दशमलव २३ प्रतिशत कममा ठेक्का स्वीकारेको थियो ।

नाटक घरको निर्माण कार्यलाई १ तला उठाएर बस्ने सिँढी बनाउने काम भइरहेको छ । साहित्य, कला, संस्कृतिको केन्द्र मानिएको विराटनगरमा नाटक घरको अभावमा राष्ट्रिय तथा अन्तर्राष्ट्रिय स्तरको नाटक महोत्सवमा समस्या हुँदै आएको थियो । साँघुरो ठाउँ हुँदा कोचिएर दर्शकलाई नाटक हेर्दा निकै अप्ठ्यारो हुने गरेकोमा नाटक घरको निर्माणपछि समस्या समाधान हुने आरोहण गुरूकूलका अध्यक्ष भैरव क्षेत्रीले बताए ।

करीब ७ वर्षअघि निर्माण भएको सुशिला कोइराला नाटक घरमा २ सय ४० जना मात्र अट्न सक्ने क्षमता छ । हाल निर्माण थालिएको नयाँ नाटक घरमा ३ सय ७० जना अट्ने अध्यक्ष क्षेत्रीले जानकारी दिए । गुरूकूलको प्राङ्गणमा रहेको जग्गाको पछाडि होस्टेल निर्माण गर्ने तयारी भएको छ । विराटनगर महानगरले उपलब्ध गराएको १२ कट्टा जग्गामा १२ वटा कोठा भएको २ वटा भवन र शुशिला नाटक घर छ ।

गुरूकूलले मुलुकका लागि सफल रंगकर्मी उत्पादन गर्न सफल भएको छ । मेयर भीम पराजुलीले विराटनगरको १ मात्र धरोहर साँघुरो हुँदा आफैं दूतावास धाएर गुरूकूल निर्माणको लागि काम भइरहेको बताए । पराजुलीले साहित्य, कला, संस्कृति क्षेत्रको विकासका लागि बन्दै गरेको नाटक घर कोशेढुंगा सावित हुनेछ ।

तर निर्धारित समयमा नै सकिनुपर्ने गुरूकूल निर्माणको काम भने विभिन्न कारणले म्याद गुज्रिएको छ । सन् २०१७ डिसेम्बर २० मा शुरू भएको काम १५ सेप्टेम्बर २०१८ सम्म सक्ने गरी २०१७ जुन ५ मा सम्झौता भएको थियो । तर सम्झौतामा उल्लेख भए अनुसारको समयलाई आधार मान्ने हो भने १ महिना ढिला भइसकेको छ ।