काठमाडौं– सुदुरपश्चिमको प्रदेश सरकारले कार्यालय समयमा नीजि अस्पताल तथा क्लिनिकमा जाने चिकित्सक तथा स्वास्थ्यकर्मीलाई निगरानीमा राख्ने भएको छ । 

सरकारी अस्पतालमा कार्यरत चिकित्सक तथा स्वास्थ्यकर्मीहरु निजी क्लिनिकमा जाने गरेको गुनासो बढेपछि सुदुरपश्चिम सरकारले क्लिनिकमा जाने सरकारी चिकित्सकहरुमाथि निगरानी बढाएको हो । सुदुरपश्चिम प्रदेशको सामाजिक विकास मन्त्रालयको स्वास्थ्य निर्देशनालयले उक्त प्रदेशभित्रका अस्पताललाई पत्र नै काटेर चिकित्सकहरुलाई निजी क्लिनीकमा नजान चेतावनी दिएको छ । 

निर्देशनालयले उपक्षेत्रीय अस्पताल–डडेल्धुरा, सेती अञ्चल अस्पताल–धनगडी, महाकाली अञ्चल अस्पताल –महेन्द्रनगर, सुदुरपश्चिमका सम्पूर्ण जिल्ला अस्पतालहरु, प्राथमिक स्वास्थ्य केन्द्र तथा स्वास्थ्यचौकीहरुलाई पत्र नै काटेर आफ्नो पदिय जिम्मेवारी अनुसार  नियम भित्र रहेर काम गर्न निर्देशन दिएको हो ।

निर्देशनालयले सरकारी चिकित्सक तथा स्वास्थ्यकर्मी कार्यालय समयमा क्लिनिकमा भेटिएमा कारबाहि गरिने चेतावनी समेत दिएको छ ।  सरकारी चिकित्सक तथा स्वास्थ्यकर्मीलाई जिम्मेवार बनाउन प्रदेश सरकार मुख्य मन्त्री तथा मन्त्रिपरिषद्को कार्यालय, सामाजिक विकास मन्त्रालय र स्वास्थ्य निर्देशनालयबाट अनुगमन र निगरानी गरिने जनाएको छ ।