विराटनगर– पूर्वउपप्रधान तथा अर्थमन्त्री भरतमोहन अधिकारीको विराटनगरमा आज भव्य नागरिक अभिनन्दन गरिने भएको छ । विराटनगरलाई कार्यक्षेत्र बनाएर लामो समय विताएका ८३ बर्षीय नेकपाका नेता अधिकारीको आज ११ बजे विराटनगरको बीरेन्द्र सभागृहमा नागरिक अभिनन्दन गरिने भएको हो ।

अन्तराष्ट्रिय जेष्ठ नागरिक दिवसको अवसर पारेर अधिकारीलाई नागरिक अभिनन्दन गर्न लागिएको नागरिक अभिनन्दन समारोह समितिका संयोजक डा. भेषप्रसाद धमलाले बताए । अभिनन्दन कार्यक्रम संचालनका लागि एलिड क्लवका अध्यक्ष समेत रहेका डा. धमलाको संयोजकत्वमा ३ सय १ सदस्य मुल समारोह समिति गठन गरिएको थियो । 

२०४६ सालको राजनीतिक आन्दोलन अघि विराटनगरमा ल फर्म चलाएर बसेका अधिकारी २०४६ सालपछि पूर्णकालिन राजनीतिमा लागेका हुन् । ४६ सालको जनआन्दोलन अघि विराटनगरमा राजनीति जागरण ल्याउन उनले भूमिका खेलेका थिए । नाताले स्व. कृष्णप्रसाद कोइरालाका भान्जा पर्ने अधिकारीले मातृका प्रसाद कोइरालाका छोरा कमल कोइरालासँग मिलेर विराटनगरमा लामो समय ल फर्म चलाएका थिए ।

विराटनगरमा ल फर्म संचालन गरेका बेला अधिकारीले राजनीतिक मुद्दामा पक्राउ परेका व्यक्तिहरुको पक्षमा बढी बहस गर्ने गर्दथे । बहुदलिय आन्दोलनपछि स्वर्गीय मनमोहन अधिकारीको नेतृत्वमा बनेको ९ महिने कम्युनिस्ट सरकारमा अधिकारी अर्थमन्त्रीको रुपमा थिए । उनी स्वर्गीय मनमोहन अधिकारीका भाई पर्छन् । 

जेष्ठ नागरिकलाई वृद्धभत्ता दिने कार्यको प्रारम्भ गर्न भूमिका खेलेका अधिकारी पछिल्लो समय राजनीतिक जीवनमा थोरै मात्र क्रियाशिल छन् । शारीरिक अवस्थाका कारण राजनीतिमा कम देएिको उनका निकट रहने बताउँछन् ।