जनकपुरधाम – २ नम्बर प्रदेशसभा अन्तर्गतको सार्वजनिक लेखा समितिले कार्यसञ्चालन कार्यविधि सर्वसम्मत पारित गरेको छ ।

मंगलवार बसेको समितिको दोस्रो बैठकले यसअघि मंसिर ८ गते गठित उपसमितिले प्रस्तुत गरेको प्रतिवेदनमा केही संशोधनसहित सर्वसम्मतले पारित गरेको हो ।

समिति बैठकको अध्यक्षता गरेका ज्येष्ठ सदस्य समेत रहेका नेपाली कांग्रेसका सांसद शिवचन्द्र चौधरीले भने, ‘पहिलो बैठकबाट गठित उपसमितिले कार्यविधि सम्बन्धी समितिमा पेश गरेको प्रतिवेदनमा केही संशोधन गरेर सर्वसम्मतले पारित गरिएको छ ।’ 

१२ सदस्य रहेको लेखा समितिको मंगलवारको बैठकमा ८ जना सांसद उपस्थित भएका थिए । समितिमा ज्येष्ठ सदस्य नेकपाका लगनलाल चौधरी भएपनि उनी २ बैठकमा लगातार अनुपस्थित भएकाले अर्का ज्येष्ठ सांसद शिवचन्द्र चौधरीले बैठकको अध्यक्षता गरेको समितिका सचिव शान्तिराज प्रसाईले बताए ।

पारित भएको कार्यविधिमा समितिको कार्यक्षेत्र प्रदेश सार्वजनिक लेखा, प्रदेश कोष सम्बन्धी महालेखा परीक्षकको वार्षिक प्रतिवेदन, प्रदेश संवैधानिक निकाय तथा आयोगका प्रतिवेदन रहने उल्लेख छ ।

प्रदेश मन्त्रालय र स्थानीय तहको सार्वजनिक लेखासँग सम्बन्धित नीति तथा कार्यक्रम, स्रोत परिचालन, व्यवस्थापन लगायत क्रियाकलापको मूल्यांकन गरी सम्बन्धित निकायलाई आवश्यक निर्देशन दिने र समूचित टिप्पणी, सिफारिस र निर्देशन सहितको वार्षिक प्रतिवेदन प्रदेश सभामा पेश गर्ने लगायतका विभिन्न १२ वटा काम गर्न पाउने कार्यविधिमा उल्लेख छ ।

संघीय समाजवादी फोरम नेपालका सांसद रामअशिष यादवले भने, ‘समितिको कार्यलाई असहयोग गर्ने, समितिको निर्देशन पालना नगर्ने, समितिले माग गरेको विवरण नदिने र समितिले बोलाउँदा मुनासिव कारण बिना समितिलाई जानकारी नदिइ अनुपस्थित हुने पदाधिकारी वा कर्मचारीलाई कारबाही गर्न सम्बन्धित निकायमा सिफारिस समेत गर्नेछ ।’

नेकपाका सांसद सत्रुघन महतोले भने, ‘अब सार्वजनिक लेखा समितिमा प्रदेश सरकारदेखि स्थानीय सरकारद्वारा विनियोजित बजेटमा कुनै पनि किसिमको अनियमितताबारे उजुरी परे लेखा समितिले त्यसको छानबिन गरेर निर्देशन समेत दिन सक्नेछ ।’ अनियमितताको सन्दर्भमा कारबाही गर्ने निकायमा सिफारिस समेत गर्न सकिने महतोले बताए ।

‘प्रदेशमा भ्रष्टाचार छानबिन गर्नका लागि लेखा समिति प्रतिवद्ध छ,’ सांसद शिवचन्द्र चौधरीले भने, ‘जनतामा भ्रष्टाचार सम्बन्धी रहेको व्यापक गुनासो सम्बोधन गर्न समिति प्रतिबद्ध छ ।’ 

प्रदेश सभामा लेखा समिति सँगसँगै बाँकी समितिको बैठक पनि बस्न थालेको छ । प्रदेशमा सार्वजनिक लेखा समिति, प्रदेश मामिला समिति, अर्थ तथा योजना समिति, विकास समिति, महिला, बालबालिका तथा सामाजिक न्याय समिति, प्राकृतिक स्रोत तथा वातावरण समिति र कृषि तथा भूमि व्यवस्थापन समिति गठन भई सबै समितिको बैठक बस्न थालेको प्रदेशसभा सचिवालयका उपसचिव शान्तिराज प्रसाईले बताए ।

प्रदेशमा १ सय ७ जना सांसदको संख्या रहेकोमा राजनीतिक दलले पठाएको नामावली अनुसार गठित विशेष समितिमा १२ देखि १४ जनासम्म सांसद रहेका छन् । ‘अहिले सबै समितिको २ वटासम्म बैठक बसी सकेको छ, प्रायः सबै समितिको कार्यविधि बनिरहेको छ,’ उपसचिव प्रसाईले लोकान्तरसँग भने ।

अहिले कुनै पनि समितिको सभापतिका लागि निर्वाचन भई नसकेकाले बैठकमा उपस्थित ज्येष्ठ सांसदको अध्यक्षतामा बैठक बसिरहेको छ । सबै समितिका लागि १ जना सचिव, १ जना कार्यालय सहयोगी र १ जना सहायक कर्मचारी उपलब्ध गराइएको सचिब प्रसाईले बताए ।

संसदको बैठक नचलेको बेला समितिको बैठक बस्ने गरेको छ । सबै समितिको बैठकका लागि हल समेत उपलब्ध गराइएको छ ।